2月23日星期日，天晴，氣溫20度，濕度約60%，最啱戶外活動。
朝早9:17，收到朋友訊息問功課:
筲箕灣巴士站好多人等緊9號巴士，睇怕龍脊會逼滿人，有無替代路線?
我隨便畀咗幾條路線佢，結果11:03又收到佢訊息:
喺鰂魚涌街市對出已經見到成條柏架山道都係人，典算?
----- 廣告 Ad -----
我已經唔知點覆佢了。
呢個周末，個個山頭都好爆。
全港郊區大塞車
我山雞一早預咗呢個周末好多人上山，所以星期日嘅節目係留喺屋企做鍵盤戰士。下晝陸續睇到唔少行山 group 已經有人話山頭好擠逼，其中呢張大帽山道嘅相，更喺網上瘋傳:
上圖: 大帽山觀景台
----- 廣告 Ad -----
然後，唔少郊區嘅道路亦因為太多車違泊，而搞到周圍塞車。
南生圍 圖: 小心駕駛(討論別人駕駛態度)
咁全香港究竟有邊區因為太多人郊遊而塞車? 我山雞喺星期日下晝三點左右，上咗 Google Map 睇睇個情況: (注意: Google Map嘅路況顯示，綠色道路指暢通無阻，橙色係塞塞地，深紅色係塞到唔郁得。)
山上同時間塞人
山腳下面塞車嘅同時，山上面就梗係塞滿人啦。
獅子山 圖: 網上圖片
人一多，垃圾佈滿山頭:
圖: 網上圖片
圖: 網上圖片
----- 廣告 Ad -----
人潮引發郊野大災難
疫情未如政務司司長所言「受控」，不過喺口罩及消毒用品供應較為正常之下，大家喺屋企屈咗咁耐，去郊外行山欣賞大自然風景當然無可厚非。同情地諒解，唔少香港人以前未必成日去郊外，所以至會有揸車去郊外唔知泊邊，行到上山無垃圾唔知點處理等問題。希望透過各方面嘅教育，佢哋可以有番啲公德心啦。
無論點都好，去到郊外玩，一定要記住:
1. 盡量唔好揸車 違泊都要留電話
郊外地區道路狹窄，好多馬路好似大帽山道咁，屬單線雙程。亂泊喺避車處，又唔留電話，有大車過唔到會釀成塞車大災難。不過最好其實都係，唔好揸車行山，坐公共交通工具啦。
2. 揀一條步行可達嘅行山徑
多人行山未必係問題，問題係大家都一窩蜂，所以要明白「分散」嘅道理。既然大家行山為咗抗疫，所以無理由專登同人逼餐死。呢個時候，大家不妨留喺自己嗰區，行下晨運徑、後山嘅山徑。呢啲地方或者名不經傳，但仍可達到強身健體嘅目的。(有人話可以行夜山，不過夜山有一定危險，對於無郊遊經驗嘅朋友，我山雞唔太贊成。)
3. 好好保護山徑
唔好亂拋垃圾，帶走自己垃圾，唔係口號，係習慣。
4. 山徑太多人，不如落山先
疫情之下，太多人聚集會容易轉播疾病。既然行山為咗抗疫，見到山上太逼人，記得戴番個口罩，甚至不妨落山退出。
5. 唔好食煙，小心火種
星期日嘅馬鞍山大火，睇到好心痛 (山火未確認由吸煙人士引起，但係上山就食少支啦)。
圖: 網上圖片
圖: 網上圖片
人多去行山唔一定係壞事，但滿山垃圾就一定係，希望下個周末唔好再見到呢啲混亂情況。
Fitz按: 上述圖片力求引述原圖出處，但部份圖片流傳甚廣，如有錯誤或遺漏，請立即通知
----- 廣告 Ad -----
