喺香港行山，裝備要講求輕巧，呢堆嘢留番明日之後再用啦
行山裝備絕對要輕巧但有用，呢幾樣嘢唔只幫到你，仲絕對係符合呢個要求。而且，仲令人意想不到：
- 打火機：你唔食煙唔會喺山野煮飯，但都應該要帶個火機。火機絕對是輕便而重要嘅求生工作。遇到意外，佢可以生火，用嚟取暖，煮食，以至發出警報求救（如整白煙通知直升機位置）。而火亦係良好切割工具。
你估求生神人Bear Grylls (Man Vs Wild主持)，如果手上有個打火機，仲會唔會鑽木取火？
- 零食：之前文章《打破謬誤! 要認真思考的行山常識》講過，零食重要性不亞於乾糧食水。要補充嘅係，大熱天時，唔好帶朱古力行山。我真係唔識分朱古力嘅屎，同屎味嘅朱古力。
- 衛生巾/護墊：理論上一Team人行山應該要有人帶急救箱。不過我就會帶兩塊衛生巾，佢嘅清毒止血功能同急救用敷料異曲同功，遇到有女隊友急需，仲可以幫下手丫嘛！
- 密實袋：一落大雨，你喺山頭野嶺必定濕身。而其中最容易整濕嘅係手機同銀紙。其實，就算唔落雨都最好密實袋袋住部電話，以免畀汗水整濕。而且，行山其實亦唔應該帶平日出街嗰個銀包，拎幾張銀紙、證件，搵個細細地密實袋袋住，就可以上山嘞。
張相係就舊咗啲。而家當然唔會袋摺機，而係袋埋你嘅尿袋。
- 大膠袋：記住「自己垃圾自執」。見到郊野有衰人搞到周山垃圾，亦大可發揮大愛精神，幫手執佢哋走。而垃圾最好棄置於馬路邊嘅垃圾桶。
早前南華早報影到郊野公園畀人搞到咁。相信你行過都會忍唔住，執得幾多執幾多。
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。