[戶外活動超輕量化] 有佢一定掂

而家啲後生山友，下下衝住去。佢哋嘅格言係：慢慢唔緊要，最緊要快。所以，佢哋一定唔會孭重嘢。

有人就問我，行山、遠足，孭上身嘅裝備有無得超輕量化？

我一定話得，你唔帶水都可以行山，危險之嘛。

行山要點執嘢我已經喺唔同嘅文章講過好多次，呢次只係想講，想令自己行山遠足嘅背囊輕便的，真係唔少呢件廚房用品。

呢個就係：密實袋

點用：

1. 將銀包有用嘅證件、銀行卡、銀紙、鎖匙 (只限屋企門匙)、八達通、handphone、尿袋等，放晒入去。咁你就唔使拎個重甸甸嘅銀包，同埋屋企公司抽鎖匙嘞。
2. 將食物 (蛋糕、餅乾、糖果、乾果等) 拆開包裝紙、罐，直接放晒入密實袋。特別係嗰啲獨立包裝嘅食物，佢哋嘅包裝紙其實唔輕。有人就鍾意行山食罐頭桃，咁你話一罐重啲，定係一袋桃重啲？
3. 急救包：放膠布、藥物，唔使拎個急救箱。

有人或者會話，你講嚟講去，只乜過係用密實袋入住啲必需品，邊有拎少到嘢呢？

我嘅經驗就係，當你每次出發前，重新執過一次嘢 (包括日日用嘅銀包)，你會帶少好多無謂嘢，咁都唔叫超輕重化？更何況，密實袋最基本功能，就係防水！我就試過拎住張滴緊水嘅一百蚊紙找的士數，畀司機拒絕！我一定唔會再試囉！

最後，一定要提醒大家，密實袋都會污染環境，記得重用重用再重用 x 100。

更多：
Fitz.hk Facebook專頁
[母親節獻禮] 帶阿媽去「遊船河」
[CNN推介] 香港5大公眾燒烤場
[由街市出發] BBQ揀場攻略
[唔行無得食] 8大隱世豆腐花
Fitz 生活 Life