[揚威國際嘅毒男] Kelvin推介3大影相勝地

香港毒男終於吐氣揚眉，鍾意影相嘅19歲學生Kelvin袁斯樂，勇奪「國家地理」攝影大賽嘅青年組冠軍及佳作兩個獎項。

訪問Kelvin係咪承認自己係毒男，佢毫不諱言回答：「係㗎，我係㗎！不過我毒喺個山上面囉，而且我識同人溝通㗎。」其實所謂毒男、毒L，咪又係我哋呢啲自以為生活多姿多采嘅人，對其他人嘅標籤，根本無乜意思。

唔講呢啲，講返影相。Kelvin專誠為大家提供3處又易去，又可以影靚相嘅地方：

1. 大帽山山頂
點去：「梗係喺荃灣搭的士上閘口個停車場啦，大概70蚊錶。之後慢慢沿馬路行45分鐘，就可以到山頂嘞。」

有咩影：「如果得2至3級風，濕度有95%以上，就可以睇到雲海。夜晚天色好，又可以睇星，搵個波波（即係山頂天文台個雷達）做背景影相。當然，大帽山頂亦可以影下日落啦。」

2. 萬宜水庫東壩
點去：北潭涌搭的士

有咩影：「嗰度係地質公園，當然可以影岩石。而且嗰度亦好適合影星星，亦可以影日出日落。」

3. 飛鵝山
點去：可以坐的士上，沿飛鵝山道，可直達東山觀景台。

有咩影：「可以影到好有香港特色嘅風景，就係郊野同市區連為一體。」Kelvin又話，佢去過其他地方影相，但仍然鍾意香港。因為佢話香港嘅風景有山有海，又會夾雜高樓大廈，好特別。而佢自己亦鍾情飛鵝山，難怪佢兩個「國家地理」嘅獎項，都係憑飛鵝山嘅相奪得。

影靚相基本裝備：

1. 腳架
2. 一部可調較光圈快門的單鏡相機

Kelvin話：「所謂靚相其實構圖好重要，而呢方面，同你用咩機無乜大關係。」佢又話：「影風景相90%個睇個天（天氣），10%只靠個人技術。不過，呢10%如果做得唔好，就完全可以破壞另外嗰90%。」

所以Kelvin強調，影相其實要做足準備。例如要事前去睇位，到天氣合適就可以即時影相。而且亦要捱得，當中最難頂係係要起身影日出。

Kelvin最新短片《香港郊野公園 2015》(請開啟 [ 音量 ] [ HD ] 觀看)

圖片來源：Kelvin’s Landscapes

更多：
Fitz.hk Facebook專頁
[睇那星] 香港最佳觀星地點
[港式浪漫] 香港3大燈塔
[新手必問] 想行山，應該去邊?
Fitz Hiking 行山