[武漢肺炎] 屋企攀上珠峰8,850米「家居登山」英國熱爆

Rory Southworth

疫情爆發後，歐美唔少國家都實施家居隔離令，大家無得出街跑步，有人就喺後花園、露台同客廳跑步。而英國因為居住環境有少少唔同，唔少人就喺屋企行樓梯健身，甚至有人喺屋企挑戰珠穆朗瑪峰。

Full Gear上英國最高峰

本身係耐力運動員嘅 Rory Southworth，疫症之下亦要與世隔絕，佢選擇喺屋企做最擅長嘅事，就係爬山。

Rory 著晒全身裝備，好似攀越雪山咁，喺屋企行樓梯，中途補給更加 set 好晒帳幕，用晒戶外 cookset煮食物。結果佢成功「攀越」全英最高峰 Ben Nevis，以及威爾斯高峰 Snowdon。

Rory 話休息一排之後，會組隊去挑戰珠峰大本營 (5364米，當然係虛擬活動)。Rory 話，佢希望藉住呢啲挑戰去話畀大家知，其實爬高山唔係咩大不了嘅活動，佢話佢只係每朝早少少起身，行完之後仲可以「落山」嘆番份早餐喎。

上珠峰要四日

住喺英格蘭南部嘅 John Griffin，屋企地方唔算大，但三層樓，於是佢決意用行樓梯嘅方法「爬上珠峰」。佢計過，屋企嘅樓梯一共有30級，佢共要上1,363次，先可以到達珠峰高度8,850米。

John 向傳媒話，當佢去超市買嘢見到乜都被人搶晒，得知食物銀行籌集物資遇上好大困難，於是希望完成創舉為食物銀行籌款。佢亦希望佢呢個活動，可以令公眾喺疫症之中有番少少鼓勵。

佢每日清晨開始，每日行6個半鐘，行咗4日，先至達到目標。事後佢話筋疲力盡，而家見到條樓梯已經腳軟，相信未來一段日子，佢都喺屋企低層生活，唔會上樓瞓覺。

資料: CNN