Fitz > 運動 Sports > 行山 Hiking > [毅行之後] 10個毅行者的所見所聞所想…

10個毅行者的所見所聞所想同往年一樣,山雞照舊支援幾支毅行隊伍。今年毅行有好多所見所聞,值得記一記:

1. 操普通話嘅參加者多咗好多。有本土人士直言,樂施會再唔諗辦法限制佢哋參賽,會令香港人更加難以參加呢個活動。

2. 每年毅行都有外籍人士參賽,但今年好似洋人較少,反而日本人就明顯多咗,定係我俾個亭影響咗判斷呢?
10個毅行者的所見所聞所想_01

3. 有參加者投訴反映,喺幾個路段(如大老山、大帽山),唔少參賽者公然行捷徑(著晒頭燈嗰種)。唔理佢哋會因為咁而行少幾多,事實係佢哋豪不尊重活動嘅精神,值得大家蔑視。

4. 今年發現無論樂施會同警方,都將毅行活動對公眾嘅影響,減至最低。特別係,以往可以揸車到達嘅支援點,如水浪窩、荃錦坳,甚至終點大棠,今年警方嚴密佈防,一泊即抄咁濟(據說家聯部車,仲畀警察抄咗兩次牌)。當然,咁樣可以令普通市民減少麻煩,但山雞作為資深支援成員,喺支援人員不足,或物資太多嘅情況下,唔少Support 朋友真係有焗住被抄車嘅感受了。期望樂施會可以下年可以考慮下支援隊嘅需要啦。

10個毅行者的所見所聞所想_02
水浪窩真係people mountain people sea

5. 好熱鬧:或許係科技進步,山頭上多咗好多音樂聲,有啲似我以前細個,喺沙灘抬部「小露寶」焚機嘅死飛仔。

6. 山雞親眼所見,唔少第一次參加毅行者嘅朋友,佢哋充滿雄心壯志,操練十足十(有啲仲操到200% ),當然佢哋起步前都希望有好成績(通常係諗住25個鐘以下)。不過,有部份朋友,竟然一起步就脫腳,有啲縱然完成,成績都係平平。原因離不開初段谷得太盡受傷或過份疲勞……我山雞不下一次講過:未到100號標距柱,都唔好諗住快呀!(經驗真係好好好好好重要)

10個毅行者的所見所聞所想_03
大帽山支援點實況

7. 有參加者起步就同隊員鬧翻,最後一個人行晒100K,只係喺Checkpoint等埋隊員。有人為咗熱鬧啲,三組合併為一組,結果12人火燒連環船,1人受傷,11人喺度等。兩個情況山雞都唔認同。四個人行毅行,係有必要原因㗎!

8. 今年有間蒸磂水公司贊助咗所有飲用水。有人支持樂施會活動我山雞當然開心,不過有兩點我就覺得麻麻。第一係係蒸磂水,好似唔係太適合喺運動時飲用;第二,就係有關公司提供埋佢哋專用嘅斟水器,結果令一眾毅行者都要蹲低身斟水,而個斟水機嘅水流又太慢。有啲參加要由背囊拎出水袋,又要拎手杖又要拎電筒,真係相當狼狽。(我山雞就超鍾意以前下壓式斟水裝備,禁兩下就有1公升,又快又正!)

9. 官方補給明顯改善好多,特別係基維爾嘅熱湯及燒賣,以及鉛礦坳嘅杯麵,無論時機同食物質量都超級令人滿意。

10. 今屆毅行首次由全港人隊伍贏得冠軍,真係要講返句:「香港人勁揪!」

10個毅行者的所見所聞所想_04
基維爾營

(編按:今屆毅行大家仲有咩所見所聞? Facebook留言講嚟聽下!)

更多:
[Fitz出戰毅行] 痴線,我永遠都唔會行毅行! (下集)
[Fitz出戰毅行] 痴線,我永遠都唔會行毅行!
[毅行之後] 回復身體疲勞的法寶
Fitz出戰毅行@Fitz.hk
毅行者@Fitz.hk
Fitz Hiking 行山


文章為作者意見,不代表Fitz立場。