[毅行備戰2015] 第四段: 水浪窩至基維爾營

[按：「毅行備戰」呢個系列，想將毅行者嘅基本資料重新整理，山雞希望可幫到各位毅行新手啦。各位如果係毅行老手，亦歡迎同大家分享你行毅行者嘅經驗。]

圖片來源: http://johnchan.phychembio.com/

第四段：水浪窩至基維爾營（CP3—CP4）

標距柱：M068-M094
距離：12.5 公里
途經：由CP3檢查站，緩緩登上馬鞍山山坳；過大金鐘山腳，經昂坪、芧坪；以及路過黃牛山、花心坑、三塊田。最後至基維爾營地。

路況及地勢：

1. 在CP3檢查站，一口氣登上600米馬鞍山山脊（樓梯佔九成），可說耐力大考驗。
2. 在登上馬鞍山山脊之後，就是漫長（超過10公里）及相較平緩嘅泥路。難度不大。

登上馬鞍山嘅山脊後，就係漫長嘅泥路。

----- 廣告 Ad -----

注意事項：

1. 驟眼睇，第四段只要翻越一座大山：馬鞍山（算係半座啦），但千祈唔好掉以輕心。唔少行山友都覺得呢段麥徑係10大難行之首。原因係登上馬鞍山山脊後，漫長之泥路，少啲耐性都唔掂。
2. 切記：對新手嚟講，未過標距柱M100都唔好發力跑，所以就算條路有幾長有幾悶，都唔好心急。留力，留力，留力呀！
3. 初段要一口氣登山五六百米，所以在檢查站休息時，記得拉拉筋，唔好畀身體cool down。
4. 雨天行呢一段，泥路令人舉步艱難。正式毅行活動固然令人意志消沉，不過訓練時，可專登安排在雨天試試這一段，試下行山鞋畀爛泥啜住嘅滋味啦。此段完全無士多店舖，路程又長，可多帶點零食，邊行邊食。
5. 在昂坪前山脊有時非常大風，夜間行經要預備風褸。
6. 此段終點基維爾營，沒有公共交通到達（的士可到，但唔會有吉車上），訓練時要留意這點。
7. 基維爾營地為毅行者補給最豐富，服務最完善的檢查站（有按摩及腳部護理）。而參加者無論體力及心理上，均要好好休息。若唔係要做時間，可安排喺呢度大休，不過千祈唔好訓覺，一訓著要撻番著就唔易。

呢啲密林內嘅泥路，可安排一次雨天訓練，試下畀爛泥啜下對鞋嘅滋味。

第四段地標「長城」

到達CP4的目標時間：
全程25小時：11小時15分（分段3小時30分）
全程30小時：13小時30分（分段4小時30分）
全程35小時：15小時（分段5小時）

註：有關「目標時間」

參考自樂施會官網2012年參加者小冊子，千祈唔以為係行貨，根據本人經驗，佢列出嘅「目標時間」極有參考價值，計埋路況、山徑艱難程度，甚至休息時間。參加者依住佢個時間，可控制自己步速。

至於我只列舉25至35小時作參考，是基於對新手來說，這個時間概不用捱兩晚眼訓，而又不太難去衝破。當然，提多一次，呢個毅行備戰系列主要為新手而設，各位老手有咩心得，記得留言同我多多交流呀。

更多資料：樂施毅行者官方網頁

更多:
[毅行備戰] 第三段: 北潭凹至水浪窩
[毅行備戰] 第二段: 大浪西灣至北潭凹
[毅行備戰] 第一段: 北潭涌至大浪西灣
山雞其他文章
Fitz Hiking 行山