圖: 漁護署
近日天氣漸漸回暖，意味著冬眠中嘅蛇都陸續訓醒。而露營往往都會去一啲杳無人煙，又近水源嘅X位，果啲正正係蛇類最鍾意去嘅蛇竇黎，所以今次分享有關於蛇嘅知識。
香港蛇類大約有52種，其中14種係有毒，當中有8種係會致命，有6種仲要係相當常見，包括: 金腳帶、銀腳帶、飯鏟頭、過山烏、珊瑚蛇及紅脖游蛇。而其他的雖然毒不致死或唔常見，但一樣有可能會感染到例如破傷風等問題，所以唔係毒蛇就唔驚。
不過又唔駛擔心，因為蛇其實好細膽同埋只會打有把握嘅仗，尤其係毒蛇，因為毒液係對佢哋黎講係非常重要嘅獵食工具，所以面對人類依啲大型生物，除非受到挑釁、攻擊等威脅，否則都會逃走優先。
所以當遇上蛇時，唔需要驚慌及攻擊佢，先防止小朋友及毛孩接近，並保持2米距離，俾適當嘅空間條蛇離開，佢就會自己逃離，如果佢無反應，就可能附近有佢嘅屋企，咁就慢慢後退離開該範圍。千奇唔好用雄黃、硫磺等破壞大自然的方法去驅蛇，一黎硫磺要燃點先有驅蛇效果，二黎雄黃主要成份為硫化砷及二氧化二砷，都係提煉「砒霜」嘅主要原素，未驅蛇前都已經可能毒死自己，另外石灰唔係唔得，但一掂水就會產生發熱嘅化學作用，隨時變埋燒地L。
眼鏡王蛇/過山烏 圖: 漁護署
----- 廣告 Ad -----
遇蛇應對方法
但當蛇感到受到威脅、迫入牆角無路可走時，一樣會對人類作出攻擊，如果不幸被咬，就要:
記低蛇嘅樣、特徵
唔同品種嘅蛇會用唔同血清，最緊要記低外型同顏色，有助醫生診治。
盡量保持靜止
因移動會加速血液運行，所以盡量唔好郁並將傷口放低過心臟，減慢毒液入心。
傷口處理
如果情況許可，先用清水處理傷口(但唔好直接用水沖)，用繃帶或衣物喺傷口上方施壓，並將傷口附近嘅飾物、首飾等除低，令血液慢而暢順運行。
切勿飲食
含酒精或咖啡因，因為會導致心跳加速，藥物都要停止。
----- 廣告 Ad -----
求救
保持冷靜，致電999或112搵醫療協助及等待救援。
蛇係一類看似好高攻擊性，但實際好細膽嘅動物，雖然外貌唔討好，但其實都好溫馴，用少少時間認識下佢哋，下次有機會見到，都無咁驚先。
