呢幾日有人傳嚟一篇「新聞」，話英國有一場5000人參加嘅馬拉松比賽，有4999人跑錯路，剩番嗰個就冷手執個熱煎堆，拎咗冠軍。單新聞本身固然出奇，但最出奇嘅係，呢單其實係2013年嘅「新聞」，但竟然畀人當今時今日嘅「新聞嘅傳開嚟…
講返轉頭，將呢單「新聞」傳畀我嗰位仁兄同我講，佢話跑馬拉松就最驚跑錯路，因為一時大意就將多年心血付諸東流。而佢問我，究竟行山有咩會令你驚？
咪以為一大班人行山唔會出事，小心駛得萬年船呀。
我所恐懼嘅，大多數都係大家要小心嘅事，不過第五樣，都真係唔想再諗返：
----- 廣告 Ad -----
- 唔見嘢：《台灣人單拖暴走麥徑》，嗰位台灣人就好大意咁喺麥徑二段跌咗銀包。而我就親眼，我同朋友喺尖山落返城門水塘攞車，先發現唔見車匙？最後點？佢都叫好彩，來回前後一個鐘，唔使上到山頂就搵番條車匙。
- 唔見隊友：有時要匿入樹叢方便，通常會叫隊員行先。你試過方便完之後，行一大段都搵唔返佢？嗰一大段，都咪話唔心慌。
- 驚缺水：雖則話《行山帶水有學問》，但老貓亦有燒鬚嘅一日。唔夠水相信大家都試過，輕則搵路人乞水，重則要Cut行程，用最快嘅方法落山。
- 有野獸：香港嘅山野，除咗蛇之外，似乎無乜有攻擊性嘅野生動物（嗱，野豬好少主動攻擊人類架）。但喺山頭見到穿山甲（聽前輩講幾十年前西貢成日見到）、大蠎蛇阻路，我就未必可以鎮定處理。
- 有幻覺：每次毅行者，行咗三十幾個鐘，去到第九段大欖水塘林道，時值夜晚，加上已經捱咗兩晚，行咗成90公里，不期然會出幻覺。無乜嘢就嘅，就只係不斷見到前方有燈，以為係第十段Checkpoint。嚴重嘅，有其他人就見過有清裝人抬轎、有獅子老虎，甚至有成隊著白衫嘅長髮女人行過…… (呢個故事，真係有機會再同大家講。)
麥徑九段，日頭行當然好舒服。但夜晚行，加上捱咗兩晚，真係乜都可以見到。
更多:
[山野餐廳實搵笨?] 13蚊一粒墨魚丸
[上山容易] 婆仔上樓級大法
山雞其他文章
Fitz Hiking 行山
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。