早前見到有人喺露營 forum 招人玩荒野求生，懷住好奇之心嘅老hike 膽粗粗問玩法。原來只係想攪一啲比較raw (原始) 的露營，同荒野求生爭得遠，因為荒野求生需要嘅知識、技能非常之多，今次分享荒野求生時所技能。
製造水源技能
喺人類身體設定下，唔飲水最多維持到三日，反而唔食野，三個星期都未有事，所以不論野營、宿營定係荒野求生，水源都係最重要。同野營唔同嘅係，求生地點唔係自己選擇，未必有水源的，所以唔止要識尋找水源，仲要識製造水源及淨水。
搭建 shelter (遮蔽點) 技能
露營時，可以準備自己個 tent (帳篷) 做 shelter (遮蔽點) 黎遮風擋雨，安心過夜。但荒野求生時就需要自己搭建或尋找合適的過夜地點。最低要求都要防風、防地氣、防蛇蟲鼠蟻等，紮技就幫你打造適合嘅地方。
生火技能
荒野求生中，火嘅重要性比露營時重要百倍! 熟食需要火、驅蚊驅野獸需要火、取暖更需要火，所以最基本都要有生火技能，而荒野求生中生火，比露營時生火都係難上百倍，所以要事前多加練習。
覓食技能
解決完水嘅問題後，就要解決食物問題。覓食，是荒野求生最基本技能之一，亦因應唔同地方，覓食種類唔一樣，例如喺海邊，捕魚、捉蟹、蜆殼類多。叢林內，野果、蟲子比較多。攀爬、徒潛、釣魚等技能越多，越能增加食物種類。
----- 廣告 Ad -----
分辨毒物技能
然而，有覓食能力唔代表能分辨有無毒，例如咩魚唔食得，咩蟹有毒，咩水果唔掂得等，課本知識往往能救自己一命。
傷口急救技能
野外受傷係家常便飯，荒野求生時更加。一般最常見有: 腹痛、嘔吐、樹木損、尖石摑腳、拗柴等，為應付意外，最低限度都要可以應對以上情況。
繩結技能
繩結不論喺露營、荒野求生甚至生活上都非常有用，喺搭建shelter、淨水、覓食時需要更甚，亦因為咁，成為荒野求生必修技能之一。
分辨方向技能
因為尋找水源、覓食甚至搵木材都會離開原有地而深入叢林，如果方向分辨唔到因而迷路，會令自己陷入另一個危機。所以指南針使用或利用太陽方位去確定自己方向等技能亦需要學習。
----- 廣告 Ad -----
求救信號技能
求生去到最後，都要其他人拯救，所以需要發出求救信號，等其他人知道依度有人需要幫助。常見信號有摩斯密碼、手勢等，最少都要知道如何發出SOS、yes、no、help、stop等信號，先可以船隻或直升機溝通
可抵禦寂寞技能
荒野求生最辛苦唔係面對天氣、面對困難，最辛苦係面對寂寞，無人陪傾計，無人分享成就，依點唔係可以靠幻想就了解有幾難受，一星期或者覺得無問題，一個月已經絕對唔簡單，因寂寞而放棄甚至自殺嘅都大有人在，請有心理準備。
荒野求生當然唔止以上10點咁少，不妨 review 下自己能力足唔足夠應付荒野，先考慮要唔要玩求生記，求生技能係專業的，並唔係幾次露營就可以鍛煉到。
原文載於老hike都去camp
