火山過後嘅屯門圓頭山 圖: 張錦雄Kenneth Cheung
野草燒不盡，春風吹又生。自古到今，燒地撚都會用依句古語黎反駁，甚至反客為主話你係道德撚。今日就解釋下，燒地嘅問題。
燒地嘅影響
燒地唔係單單燒緊草皮，係因為會長時間同一地點燒，高溫會令泥土中嘅水土流失、根莖枯葉、種子死亡，同時該撻地方會泥土「陶瓷化」，要再重修就好難。
農界燒地
依個燒地同露營個燒地有所不同，農界燒地係指一幅農地上有野草，所以燒哂佢，野草變灰後，令泥土更肥沃。而個分別就係，農界燒草，果一呎泥土上，未到300°C都已經因為上面無哂草而熄咗，但露營嘅燒地，係會燒同一呎地方高溫至700°C以上。
舉個例子，用火燒你啲頭髮，同用火槍同你個頭同一點集中燒嘅分別。
石頭墊高
石頭墊高只係自欺欺人做法，石頭傳熱仲高過木頭，當石頭上嘅柴火燒到舊石熱咗，熱力會透過石頭傳入地面，高溫令泥土陶瓷化。
----- 廣告 Ad -----
用返上面例子，放個石頭喺你身上，再用火槍喺石頭上加熱，廿分鐘後，我睇唔到有分別。
點解外國做得，香港唔得
首先，你哋有冇真係去過外國 camping 而唔係睇 YouTube。
YouTube 果啲大部分都係娛樂，務求要令觀眾睇得開心，唔係教育片黎。事前嘅準備，事後嘅處理，人哋做咗幾多你又知唔知? 就鏡頭角度下，有幾多野喺鏡頭外又知唔知?
其次，依個係地少人多問題。
----- 廣告 Ad -----
香港由西貢長咀直線計到去屯門龍鼓灘，先得50km。
而喺依個咁細嘅香港入面，竟然有800萬人口，當中估計有10%人口會參與户外活動。以依個人數去計，就算做足 LNT，都對户外環境係一種衝擊，所以香港係應該比外國任何一個地方更加要做得好。
再者，教育問題。
人哋日本、澳洲、新西蘭等係將户外教育納入正規課程。美國每年冬、夏令營受訓。英國更加唔駛講，係童軍發源地。
反觀香港，可能對上一次去大自然已經係小學秋季旅行了。就算俾斬生樹，知會應該斬邊棵，邊個位置最少影響咩? 俾燒地，又會知要點燒嗎? 明白好多人都覺得 wild camp，應該要 wild 啲，用少啲工具，扮啲求生 feel，所以 camp fire 係最低門檻。但野外求生需要嘅係知識，學好啲基本野先啦。
老hike都去camp Facebook專頁
老hike都去camp 網站
