[老hike都去camp] 露營經驗分享 大小二便

露營，短則過一晚，長則三五七日唔定，所以必然會有大小二便嘅需要，但因為官site尚未開放，一眾 camper 轉戰無洗手間嘅 x site，通常都會選擇回歸大自然，所以今日講下需要注意嘅地方。

喺開始前，請大家思考下以下問題:

1. 如何唔影響環境衛生同其他野生動物
2. 點樣先將水源影響最低
3. 點樣可以加速腐化

就以上的大原則下，所以選擇大小二便時請:

勿於主要道路或空曠地方大小二便

話說有朋友 (兩個女仔) 跟新相識的網友去 camp，之後該網友居然行兩步就放條小蟲出黎抖氣，明明行前兩步就有草叢。

拜托，你唔知醜，都唔好嚇親人啦。

要遠離水源最少30公呎

為免污染水源，去大小二便時請同水源保持距離。

唔好逆風位上小便

可以幻想到一褲都係嘅畫面…..

大便需掘貓穴或便袋

因為大便需腐化嘅時間遠長於小便，長時間曝露喺地上會引起:

• 衛生問題，如果有野生動物接觸更有交叉感染嘅風險
• 市容問題，如果你去到見到有…仲要有味嘅…

所以開大係需要嚴肅處理的。如果喺外國，我會建議掘貓穴。

• 貓穴做法係用軍用剷，45度角剷入約20cm深的泥士一下翻起。
• 或打直插個交叉再翻起泥土。
• 完事就將原先的泥土還完，再加啲沙、枯枝、泥等加壓，加速泥土復原。

但因為香港太多人去 camp，人人掘，撻地都未回復又有一班新人掘，爛哂都似。再加上，香港《郊野公園條例》係唔容許掘貓穴，所以當知就算。

便袋

就以上問題，建議用便袋。

便袋其實係一個密實袋同一包吸濕珠整成。而自己制作都非常簡單，可以用密實袋加貓砂整。用完後拎返落山就得。好麻煩？唔好食咁多油膩野同濕熱野啦。

如廁後需帶走用過的紙巾

女仕應準備一個膠袋，將自己如廁後的紙巾袋好再落山處理。

紙巾係需要時間先腐爛嘅野，重點係，就咁放喺地下，風一吹、動物好奇等，非常嘔心，麻煩處理自己手尾。

大家去得露營，都係愛惜大自然嘅人。所以要保持環境整潔同衛生，堅守 leave no trace 7大原則，自己垃圾自己帶走!

老hike都去camp Facebook專頁
老hike都去camp 網站