户外入黑後，雖然月光下不至於伸手不見五指，但為咗方便自己同安全起見，都會選擇用營燈照明，喺眾多營燈入面，應該點選擇先適合自己呢，所以今次分享下關於營燈。
喺分享之前，要講下燈嘅種類。
油燈
早喺三萬年前，人類已經識用燈去夜間活動。當時係用一啲小缽做成燈盞，入面放油同燈芯，用油黎做燃料，燃點燈芯令佢發光，依支就係油燈。去到公元前30世紀，古埃及人發明咗蠟燭後，漸漸代替咗油燈。
火水燈
又名媒油燈。喺九世紀嘅巴格達，就發現有人利用燃燒礦物油制成火水燈嘅史蹟，至到電燈出現之前，一直都係主流照明工具。
----- 廣告 Ad -----
火水燈係有分 wick lamp 燈芯燈同 pressure lamp 壓力燈兩款，兩款用法非常唔同。
Wick lamp 燈芯燈
同傳統油燈類似，都係利用燈芯發光，唔同嘅係外表，燈芯燈主要分為三個部分: 燈座、燈頭、燈筒。燈座存放燃油用。燈頭有個齒輪要黎控制入面條燈芯長短黎調節亮度。而燈筒係風檔，係玻璃造。
Pressure lamp壓力燈
又名現代火水燈，於1853年面世。雖然都係用油做燃料，但同之前嘅油燈係完全唔同，用之前要先預熱，然後透過壓力將液態燃油汽化成易燃氣體，從而令燈紗持續發光。壓力燈係劃時代產品，受風影響低、亮度足夠、慳燃油、攜帶方便，所以就算1853年到依家，一直都被受追捧。唯一唔好就係有聲。
氣燈
後期發展到有液化氣技術後，燃料亦由油變氣。氣燈同火水燈原理差唔多，同樣可以做到燈芯燈或壓力燈效果，更唔需要預熱同加壓嘅動作，缺點係燃氣貴過油。
----- 廣告 Ad -----
電燈
1801年，英國化學家戴維發現將鉑絲通電係會發光之後，開始到人類嘅電燈時代。由最初嘅鉑絲到鎢絲，發展到現今嘅LED燈，配合鋰電池下，令到電燈可以帶到户外使用，現時嘅電燈唔單止亮度夠，輕巧、方便、唔熱等都係特色，所以係主流用具。
使用露營燈注意地方
Ps. 老hike對油燈認識不足，為免有所誤導，分享資料以電燈為主。
亮度
營燈亮度雖然都係用流明做基準，但營燈唔單止係要睇流明，仲要睇埋個照明範圍，一般係睇燈罩面積去估算。
至於流明，就要睇支營燈嘅用途了，如果一般喺2人營內使用，150-300流明都足夠。但如果喺天幕底做廚時用，就要考慮埋天幕嘅高度，以500流明起標，不過留意返鋰電燈係會因無電而逐漸變暗，所以最好揀啲高流明同時又可以較光暗嘅營燈。
色溫
光嘅顏色，本身係for 攝影界等用，用K黎表示，K數越高，越接近白色光。而喺營燈內，白光會比較光猛但刺眼，相反黃光就柔和但無咁清楚，可以因應自己所需而選擇。
續航力
一航露營，短則兩日一夜，長則五日以上，每日最少都要用6個鐘，無返咁上下長氣，到需要用時只係一舊石頭。而市面除咗鋰電燈之外，仲有用返傳統筆芯電、太陽能叉電等。如果兩日一夜，鋰電池比較環保同化算，四日以上就太陽能優勝，而筆芯電就穩定同可預計重量。
延伸閱讀: 再生能源
重量
營燈唔同食物，就算用哂啲電，重量都係不變，所以重量好重要。而營燈重量多數受續航力、亮度、功能、大細、設計等有影響。所以一定要取捨要功能定重量。
功能
一般營燈為咗gimmick，都會加啲另類功能如: 可當power bank用、電pump、音樂播放、有搖控等。一般而言，越多功能嘅野壞嘅機會率越高，當其中一個功能廢咗，就變相只係一個重咗嘅營燈，唔太建議太多功用。
三防
三防係指: 防塵、防水、防震。一般營燈都會塞入袋，叻嘅營友會放入衫/cookset等地方做保護，但始終會震，如果太脆弱就唔啱合做營燈。另外因爲營燈唔單止會營內使用，如果ipx太低，可能會因天雨或朝露導致入水，ipx4係基本，有6以上比較好。防塵就因為户外有沙石，如無防塵功能，不幸跌倒地下後，就相當麻煩。
----- 廣告 Ad -----
使用方式
營燈通常有兩個使用方法: 座地、懸掛。兩種方式都各有好處，但唔係每一枝營燈都適合懸掛/座地，最好可以兩者兼得，咁用起上黎顧慮會少啲。
營燈係一樣看似簡單，又唔太影響生命嘅野，但一棧好嘅營燈，喺你有需要時，隨時救到自己一命。
Ps. 如無營燈，可用電筒配合水樽或水袋代替
