立夏已過，有部分 camper 已收季留待秋季再戰，而部份唔收季嘅 camper 會轉戰海邊，去 camp 之餘仲可以玩水降溫，一樂也。但海邊其實危機重重，今次分享下海邊有咩陷阱
海膽、海刺
相信有玩開水都應該見過海膽、海刺，喺香港海域非常常見，亦都係相當危險，尤其是海刺。
佢哋通常都係停留喺淺水區，當潮退時，好易喺岸邊1米水左右發現，其中海刺啲刺尖係長而尖，2mm以下衣服都照入無誤。同時刺尖係有毒的，輕則腳部產生麻痹、肌肉無力。重則肌肉會癱瘓、呼吸困難甚至有性命危險。
如果不幸刺中，要盡快上水，先消毒傷口，再用針筒、鋏、刀等將針清除。清唔到都唔緊要，可以用熱水浸傷處止痛，如果有醋效果更好，之後毒素會溶解，餘下嘅黑色點點身體會自然吸收。
水母
又名白鮓，好多人誤會水母即係海蜇，正確黎講，海蜇係水母科內其中一種，要加工到可食用係相當麻煩，唔好咁 raw 直接食。
----- 廣告 Ad -----
水母啲觸手同身體都充滿住「刺絲囊」，而絕大部份都係有毒，每一類水母毒性都唔一樣，通常鮓中地方會有刺痛、麻痹等反應，嚴重者會呼吸困難，要做人工呼吸，有啲甚至會致命，雖然一般著防曬衣都足夠保護到自己，若不幸被鮓，先檢查傷口，再用海水浸住，之後用沙 or 食用醋灑落傷處 (僧帽水母除外，不過香港水域未見過)，再清除傷口處嘅刺絲，嚴重者要盡快求醫!
蠔殼
可能大家覺得俾蠔殼損係家常便飯，但如果係: 有患有慢性肝病、高血壓、腎功能不全、糖尿病、血液病等高危一族就要小心了，因為有「創傷弧菌」。而創傷弧菌會引致壞死性筋膜炎 (又稱”食肉菌感染”) 死亡率非常之高，所以唔好睇少蠔殼。
上落水要留意蠔殼，最好著好保護衣，如果真係損，盡快上水消毒，一有不良反應如發燒、發冷、疲倦和嘔吐，要即刻打三條九，唔好諗!
俗語有話「欺山莫欺水」本老hike 玩水多年，但從來無睇小過海洋，因為知道，山有事都仲可以有得教，水有事，只有自己可以救自己。無事先可以做世界冠軍，安全先可以長玩長有。
----- 廣告 Ad -----
老hike都去camp Facebook專頁
老hike都去camp 網站
