本老hike成日都話: 露營係個小旅行，離開本身環境，去享受另一種文化。而旅遊到唔同嘅地方，都有唔同嘅生活習慣，今次老hike分享下去到户外會有咩唔同城市嘅生活習慣。
習慣減少用水
露營不一定有水源，就算有，為咗減少污水對户外嘅衝擊，所以都會習慣減少用水。
有關用水方法，可參考: 水的文化
習慣減少使用化學品
如: 洗頭水、沖涼液、洗潔精等，因為化學品會影響當地生態環境，為咗下次再到營地時仲有草原，所以一論用茶籽粉代替為佳。
習慣户外大小二便
絕大部份營地只提供旱廁甚至無洗手間，所以城市果套洗手間文化係唔適用於户外，至於户外大小二便做法，可參考: 大小二便
習慣減少紙巾使用
紙巾可以話係露營大敵，户外見得最多垃圾一定係紙巾，所以控制使用紙巾次數，除咗女士要去洗手間外，其他如抹咀、抹手、抹面等，都可以用清水或毛巾代替，非環保意識，只係唔想拎多舊野去/走。
----- 廣告 Ad -----
習慣放輕聲浪
喺繁華鬧市中，因為嘈音大，所以大家都需要大聲少少先可以同人溝通到。但喺郊外，因為少咗啲機械聲，只要細細聲就已經足夠同人溝通，所以要習慣放輕聲浪，唔好嚇親大自然嘅一切，咁就隨時會欣賞到更多 如螢火蟲、螈蠑等美麗嘅生物。
習慣無得沖涼
城市中，沖涼屬於日常，有人甚至一日沖兩次。但野營時，沖涼比較麻煩，女仕更甚，所以習慣一日無涼沖係基本。
習慣昆蟲滋擾
去到郊外，少不免會有昆蟲爬上身或手，要習慣佢哋而唔係傷害佢哋，如果無攻擊性嘅，就由佢。有攻擊性嘅，就搵個方法送佢走，減少無謂嘅殺生，積返啲福。
習慣同野生動物共存
常言道，野生動物先係地主，我哋只係過客，只需要掛好食物同垃圾就可以和平共處。延伸閱讀: 野味攻防戰
習慣枯葉沙石同行
野外露營玩到成身沙、草係好常見。洗完轉頭又會污糟返，甚至煮食時有沙有草係家常便飯，適應唔到好難去野營。
----- 廣告 Ad -----
習慣有手尾
户外地方大風大，垃圾好易隨處飛，所以手尾好重要，否則走時要清場好麻煩。
習慣自理
雖然好多時都係團隊活動，但營友們無責任照顧自己，大多數時間都需要自理，無謂俾麻煩人哋。
露營係好chill，但如果一個城市人無心理準備下去露營其實都好辛苦，可以帶朋友去前 or 朋友入坑前俾個brief佢，有心理準備下會埋怨少啲，人都開心啲。
老hike都去camp Facebook專頁
老hike都去camp 網站
