火，令人類可以烹煮，又可以取暖，甚至可以驅趕野獸。露營入面，鑽木取火係好多人渴望嘗試嘅事，今日本老hike分享下鑽木取火嘅心得。
鑽木取火，固名思義係靠鑽木嘅磨擦力去產生熱力而生火，所以磨擦力係重點。點樣可以令個磨擦力大到生火呢? 方法有好多，例如: 手鑽法、弓鑽法、磨竹法等等。
1. 手鑽法
最基本嘅鑽法，事先需要準備嘅有: 火絨、鑽棒、鑽板。
火絨
火絨係要黎起火用，所以要揀啲乾身易燃嘅，例如: 乾芒草、松針、乾草等，如果附近無，用樹枝或竹枝，用刀來回削都可獲得絕佳火絨。
鑽棒
鑽棒就要黎做磨柱黎提供磨擦力，所以鑽棒要搵長而直嘅樹枝，仲要削尖個頭，增加磨擦速度。
----- 廣告 Ad -----
鑽板
鑽板係要黎俾鑽棒鑽嘅地方，要搵一塊大小小嘅嘅木板 or 粗身木棍，同時要喺側邊開個V字口及内側挖條小內坑，原因下面講。
手鑽法嘅做法係將火絨放喺鑽板的內坑下面，之後用鑽棒喺內坑上面用手鑽動，令鑽棒摩擦所產生的熱力令木屑著火，之後跌落火絨度生火。成功之道一字記之曰: 快。
2. 弓鑽法
因為手鑽法好傷手，所以就進化到弓鑽法。弓鑽法需要嘅野比手鑽法多。除咗火絨、鑽塊、鑽棒外，仲要壓板、繩、弓。
壓板
壓住鑽棒用，就手就得，無乜實際作用。
繩、弓
用黎綁住鑽棒用，弓可以用一枝彎曲嘅樹枝做，盡量揀啲輕身有韌度嘅樹枝，會比較慳力。
----- 廣告 Ad -----
弓鑽法比手鑽法慳力，用壓板壓住鑽棒，用拉鋸方式去增加摩擦力去生火，依家主流做法。
3. 磨竹法
磨竹法同以上兩樣方法好唔同，只需要一枝竹就得。先將竹中間劈開，之後喺一半嘅中間位開個坑口，坑口入面放入火絨，再將坑口下面放喺另一半竹上面來回摩擦加熱，令火絨著火。
鑽木取火重點係令到木屑發熱，從而火絨受熱起火，過程一啲都唔易，尤其係香港潮濕嘅天氣、三面環海嘅地理，而鑽木取火往往會可能你嘅一滴汗、一陣風令到取火變扯火，無乜必要都係唔好亂咁試。
原文載於老Hike都去camp
