[日本露營熱] 森林地價幾萬有交易 私家營地大增

大多數人去露營，都想搵條獨家村

一到露營季節，香港無論合法定非法、公開定隱世嘅營地，都會似足難民營，想搵條「獨家村」真係談何容易。近年日本亦掀起露營熱，營地需求更大，不過好就好在地方夠大，只要有錢就可以任性，有人索性買座山嚟個「自私露營」。

港幣3萬有交易

有做開森林交易嘅地產代理話，今年1月開始，森林地查詢大幅增加，8月到達歷史高位達500宗，其中70%係打算用於營地。

呢位地產代理透露，現時1公頃 (即1萬平方米) 森林地，約300,000至800,000日元，大概係2萬至6萬港幣，呢個價錢喺香港買部二手車都未必得。不過同買樓一樣，土地價格取決於位置、土地質素以及交通等因素。

不過，幾萬蚊買幅地係咪一勞永逸呢? 當然唔係。

日本公眾營地都唔少人

買地後手尾長

日本媒體訪問幾位買咗山頭做營地嘅投資者，佢哋分別遇上唔同問題:

打理花時間

一幅幾千平方米嘅土地，即係幾萬呎地方，範圍裏嘅野草要剪，大樹冧咗要搬，有熊人出沒要管，有河道要清理。有夫婦買咗300坪嘅森林，每個星期六日要花兩小時坐車上山打理。

森林地主夫婦，每個周末都要上山打理

課金不斷

有地主話，地價一啲都唔貴，最貴反而係除草機、起重機。一部重型機械，隨時貴過幅地。

防盜困難

森林難以興建密封圍欄，随時成為野生動物棲息地。有地主更話，試過有人進入土地傾倒泥頭，要花錢搵人清理。

地界不清

森林土地不容易分界，容易引起糾紛。

森林地主: 打理雖然辛苦，但都好滿足。

呢幾位地主異口同聲話，打理土地雖然辛苦，但可以獨享一個營地，確實令佢哋好滿足。

資料: excite.co.jp