完成左登日本第一高峰富士山3,776米之後，經歷雨晴雲霧，感覺就好似發左一場夢。由練山、準備物資至預訂山小屋等等，長期作戰，但係當見到山上嘅御來光時，彷彿一切都變得好渺小，世界之大，值回票價。
大自然嘅力量，好龐大。龐大到可以令我哋見得到人性嘅美好。縱使素未謀面、語言不通、來自五湖四海，但係大家都帶着一顆善良嘅初心登山。
有一個着到好似登陸月球、帶着掛上日本國旗嘅金剛仗伯伯，明知你日文係有限公司，都堅持繼續熱情地用日文同你講登山嘅過程，而你就只係黑人問號。有一個來自馬來西亞嘅姐姐，見到我哋凌晨攻頂時，塊面好似油左一層白油咁白哂，主動送上救命朱古力，個心即刻暖哂。
----- 廣告 Ad -----
溫暖，仲有係因為見到傳說中嘅富士山御來光。凌晨兩點半攻頂，高山反應下連行100米都想休息，條氣好喘。無盡碎石斜坡，負超重磅，個人啲手腳因為着左好多層衫移動困難，好似隻糭扎住左咁嘅狀態下緩緩向上。
眼前，你只有一片星空、彎彎月亮、頭燈嘅光同埋碎石。山上面好廣闊、一望無際，但係原來世界卻好細，只有身邊嘅你。當見到御來光嘅一刻，好感動，根本講唔出說話，眼睛就係你此時此刻最好嘅攝影機。
登山呢件事，係型。
孭住大背囊登日本富士山，仲型。
型嘅背後，付出左幾多汗水淚水、經歷過幾多雨水、擁有幾多毅力體力努力，真係只有山知你知我知。
----- 廣告 Ad -----
行緊富士山嘅時候，問自己仲會唔會有機會再上山。當時諗，連御來光都睇埋，仲黎咩咁辛苦為咩。宜家，終於知道了。原來係為自己創造故事、為經歷、為信念，所以我哋為夢想登上了日本第一高峰。
3776，多謝你送俾我哋最靚嘅御來光，我哋有緣再會。山上見。
更多靚相，請 follow IG @dear.moonhiker 
Fitz 連結: https://fitz.hk/?p=99050
更多:
Fitz Facebook專頁
[Yama Girl 完全山系女子] 香港50高峰系列
Fitz 行山 Hiking
