[HK 100] 參加者自述：被困大帽山極地10小時

呢一日，封閉達33小時嘅大帽山終於解封，而被困山上面嘅市民，亦喺朝早全部落山脫難，大家都總算可以鬆一口氣。惡劣天氣無人可以逆轉，相信大家亦明白，無論主辦單位、大會義工、參加者、救援人員，以至部份有心市民，都盡力去救助每一位遇到意外嘅朋友。

有參加HK 100嘅跑友，喺大帽山被困10個鐘之後，安全返家。回神之後佢向我哋講述被困嘅經歷，而佢嘅經歷，可以話展現咗光輝嘅大愛精神，愛己及人，值得表揚：

「星期六開始，我投入比賽，跑到星期日朝早7點左右，去到大帽山雷達站附近，突然聽到有人大叫『有無香港人呀，有無人有電話呀？』原來係一位參加者，佢同行嘅朋友有低溫症，要借電話向大會求助。點知佢同大會講完個電話，我哋先知原來已經喺5點幾腰斬咗賽事！」

「咁我見當中有人有低溫症，就即刻幫手報警，搵埋消防。與此同時，我亦喺路邊截住啲參加者，講畀佢哋知比賽已取消。當時情況係大風大雪，我陸續咁聚集咗30幾位參賽者， 當中四分二為國內同胞，三分一香港人，三分一其它國籍(日本、法國、新加坡等) 而當中更有一位係唔識講英文嘅法國人。」

「其中兩位內跑手見雷達站附近有間廢置破屋，去探路後叫大家就走入去暫避，等人嚟救援。而當時我雖然無受傷，但因為係我打電話報警，所以我覺得自己有責任留低，照顧其他人。」

「4個鐘頭後，有3位消防員搵到我哋。幫我哋起咗兩個火堆取暖。亦有一位消防員留喺度陪我哋。留守消防員無裝備無物資(只有1部WALKIE)。而當時，不斷聽到有直升機嘅聲音，大家亦向留守消防員施壓，因為有人低溫症，其他人又無信心自行落山。」

「當時，我哋亦有再聯絡大會，問佢哋有冇通知參加者嘅家人，因大部份人電話冇電，只能剩吓僅餘手機電求救之用。大會話消防冇俾我哋在廢屋滯留人士名單，我立即要求大會抄下大家嘅號碼布編號資料。亦有問過大家可否安排空投救援物資，不過都係無回應。」

「3個鐘後先有兩位民安隊到來，民安隊帶咗一啲繩嚟，問我哋有冇可能行到落山，話可以帶大家行一條比較安全嘅路。大家覺得乾等咗7個鐘，糧水差唔多耗盡，都唔想留落去，連有受傷嘅參加者都要堅決定落山。最後大家就一仆一碌咁落山。大家為了自救，唯有一齊跟住行，當中亦有幾位是負傷的，路上有幾險峻不提了，原本5公里路是易如反掌，現在舉步維艱，我落到山已經夜晚六點天已黑。」

「雖然好多人冇傷冇痛，但真係堅凍同餓。佢哋落到終點，去到蓮姐(大帽茶水站)到，當時個天黑晒，終點已全收搬緊嘢走，連一盞燈一個帳都冇留低，覺得大會對參賽者冇留任何支援，只有救護車消防車。我哋覺得大會已經將個波交咗俾消防救護同警方，主辦單位已經全身而退。」

「我哋之後被叫上救護車，現場消防 in-charge 上車望咗佢一眼就走。有人亦問消防，比賽大會仲有冇人在? 之後幫佢搵 race director 上救護車。」

「參加者問 race director，話想攞返行李同保暖衣物。但 race director 回應話所有行理送晒去上環，叫佢自己搭車去上環攞，話可以俾返車錢。我哋覺得 race director 回應太冷漠，期間應變不足好被動，因為聽半夜返到終點的朋友講返，原來半夜回終點的人已經勁投訴條路結冰企都有困難，連見慣冰天雪地的東北國內跑手都話企都困難，莫講話行，亦有跑手提議過派人上山灑鹽，但大會冇做到，若果再早啲腰斬賽事就少啲人傷，可能唔洗攪到上頭條咁大件事了。」

「還有比賽前幾天已經向跑手發出寒冷預告，但頭三個水站完全無熱食無熱飲，而喺北潭涌起步時，氣溫只有幾度。而沿途又多人，經常「塞車」，山徑上進展相當慢，令身體好難溫暖起嚟。只能靠身上嘅冷冰冰嘅水。」

「有人亦當面問race director明天會否有時間，好想反映意見及講佢知在山上的情況，希望大會汲取經驗，希望可以安排得更好。點知race director冇安撫冇問候，回一句冇時間就走咗。」

「今次是歷劫餘生，在山上滯留乾等接近10小時，就好像從鬼門關走出來一樣。」

師兄返到屋企，可以話係另一個惡夢開始：

「我嚇親太太，我一返到家門，太太二話不說攬住我喊，話以後唔俾我再玩山，亦唔會再支持HK100……」

呢位師兄自己明明可以落山，但喺危難時發揮人性美善嘅一面，協助受傷同行，值得向佢致敬！而我哋對參加者嘅遭遇深表同情，亦希望師兄可以快啲復完，同埋得到太太原諒啦。

而另一方面，我哋亦希望HK 100嘅主辦大會，可以盡快交待事情來龍去脈，希望一切只屬誤會。

視頻：另一位參加者的電視訪問（Now 新聞台)

更多：
Fitz.hk Facebook專頁
[HK100] 參加者專登上山畀人救?
[HK100] 義工面對生死的12小時
發生在 HK100 的幾件小事
Fitz Hiking 行山