[咁都拗] 行山用水袋定水樽?

行山用水袋定係水樽，同飲汽水用杯定係成支飲一樣，完全係個人喜好問題。不過正所謂「真理越辯越明」，唔拗過有時都留意唔到一啲小問題。水袋好：

1. 水袋容量高：一般行山水袋，最大容量約3公升左右，比起水樽嘅容量喺1公升以下（１公升以上嘅水樽，我就放唔落個行山背囊），一個水袋絕對可以拎更多嘅水，方便長途訓練（有人暑假練毅行，一次行四段都勉強OK）
2. 水袋輕便啲：水袋點都會比水樽輕啲。再加上佢可以變型，放喺背囊唔怕「哽」背脊。
3. 易於飲水：水袋嘅喉管通常置於膊頭，完全可以邊行邊飲，唔怕身體缺水。

水樽好：

1. 分開幾支拎，一支係水，一支係寶礦力，一支係冰，可帶唔同嘅飲料，唔怕口寡寡。
2. 儲水情況一目了然：水袋放背囊入面，有時飲完都唔知。用水壼水樽，飲剩幾多水一目了然。可令自己有更好計劃。
3. 補水方便：喺比賽或活動時，喺檢查站可更方便補水。

嗱，我唔怕講，我有兩次行毅行，連練習在內，都有用水袋。發覺水袋有佢唔方便嘅地方：

1. 補水麻煩：去到檢查站，由除背囊，拎水袋，打開水袋，再酙水走人，搞得太耐，唔畀後面選手媽叉，自己都唔好意思。
2. 難洗：或者我自己辣撻，有時操完返屋企，攰到唔想郁，都唔會拎個水袋出嚟洗。有時水袋裝過寶礦力，又唔即刻洗嘅話，之後好難清理。特別係水袋嘅膠管同吸咀，我見過有霉菌！有人話條管可以換，但都要一百幾十，最後索性轉用水樽。
3. 水袋有膠味：或者我用嗰啲水袋質量唔好啦（我喺沙XX買），用幾耐啲水都有陣膠味……

當然啦，如果而家啲水袋改善咗呢啲問題，我亦有興趣試番用水袋。因為講邊行邊飲水，係真係水袋先可以做到。

更多:
[上山容易] 婆仔上樓級大法
[行山杖] 唔帶都要學點用
水多人不怪? 行山帶水有學問
山雞其他文章
Fitz Hiking 行山