[學好廣東話] 北潭凹鉛礦坳咁都有得拗?

山雞 2016-05-23

[學好廣東話] 北潭凹鉛礦坳咁都有得拗f Ben Sir喺電視講鹹片名學廣東話，其實好多香港地名，都保留唔少廣東話嘅特點，大家不妨讀地名學廣東話啦。

首先問下，究竟北潭凹嘅「凹」字，同鉛礦坳嘅「坳」，邊個先係堅嘢？呢筆唔講住，我哋講埋其他香港嘅古怪地名。

[學好廣東話] 北潭凹鉛礦坳咁都有得拗 4 藪
著名地點：鶴藪
讀音：鬥
意思：密生雜草的湖澤、沼澤。
大家行過鶴藪，又係咪見到好多雜草呢？

紅圈就係老虎笏，形狀狹長。

----- 廣告 Ad -----

笏
著名地點：掃管笏、老虎笏(近大尾篤)
讀音：忽
意思：古代君臣朝會時手中所拿的狹長板子，上面可以記事。依呢個意思，就將一啲又長，又有少少彎曲嘅海灣，引申叫做「笏」。可惜嘅係，掃管笏嘅海灣已經填咗海做黃金海岸同黃金泳灘，地貌大變，都睇唔返原本形狀。不過從老虎笏，仲可以發現狹長形狀。

[學好廣東話] 北潭凹鉛礦坳咁都有得拗 6 輋
著名地點：禾輋、坪輋
讀音：斜
意思：同「斜」相通，指平原上有暗斜嘅地方。而家嘅禾輋邨，斜坡上面咪就係穗禾苑；坪輋上面就係禾徑山。

索罟灣對出嘅海灣，真係似一個漁網。

罟
著名地點：索罟灣 (南丫島)
讀音：古 (唔好讀孤，錯架)
意思：捕魚漁網。索罟灣個「索」字，指索緊。索罟灣，即係呢到好似一個索緊咗嘅漁網。地名有埋形像，絕非而家啲樓盤名可比！

同樣係政府路牌，但竟然有唔同寫法。

坳
著名地點：鉛礦坳、荃錦坳
讀者：拗
意思：兩座山中間凹咗落去嘅地方。

[學好廣東話] 北潭凹鉛礦坳咁都有得拗 3 咁北潭凹個「凹」，又同「坳」有咩分別呢？

----- 廣告 Ad -----

「凹」字，古時有「山坳」嘅意思，亦有寫成「山凹」。不過，根據台灣《國語辭典》，「凹」字喺而家已經無咗山坳呢個意思 (主要意思係凹陷)。反觀粵語，從語音上睇，仲保留凹同坳相通嘅特點。呢個，亦係粵語保留古代語言又一例證。

不過地名仲需要照顧大家使用習慣，所以，咪懶勁將鉛礦坳可寫成鉛礦凹，北潭凹寫成北潭坳，搞到大家搵錯地方就無謂。

保衛廣東話，就要認識下香港啲地名呀！

下次再講另外五個粵語地名。

十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。

[學好廣東話] 北潭凹 鉛礦坳 咁都有得拗?