魔鬼山人潮 圖: 網上圖片
話說近日勁多人上山活動，不論行山、露營、呃 like 打卡都場場爆滿，但連帶破壞和污染情況都好嚴重，真係鑊鑊新鮮鑊鑊堅。雖然以 Admin 老大既講法，「山野‧新聞庫」專頁可以記錄低破壞事件，但最終目的都係以教育為目標，因為鬧人可以隨時鬧鑊甘，但鬧完唔改都係冇意思，所以鬧完都要講番點樣改善，同時期望讀者會對保育有正面既睇法，呢個至係重點，所以今日會綜合近期常見既破壞事件，分析一下點解咁多人做出破壞行為。
以小弟既分析，山友都有唔同既背景同經驗，唔同年代既山友對登山活動都有唔同既方法，以 Admin 老大之前既分享，90年代或之前因為登山門檻較高，所以參與登山活動既人都會經過挑選，或者經過唔同既老手帶住去玩，質素會較高。當年大家對保育意識唔高，破壞行為係多，不過參與人數較小，可以靠自然修復去復元，所以果個年代通山都係野人，又爬樹又落水，玩乜都冇限制。
90年代之後，行山活動漸漸普及，MU (攀山總會) 都上軌道喇，所以接觸行山活動既人士愈來愈多，都有全港認可既山藝課程，想學行山技術都叫做有官方途徑，而漁護署既郊遊徑都做得好有系統，登山門檻減低。
直至00年至而家，電腦、手機開始普及，資訊爆炸既年代，因為手機可以處理唔少問題，例如查詢不同既行山資料、行程中隨時報告行蹤、電子地圖、行山 Apps 既幫助，所以對於大眾，好多事情都自學自用，本身唔識既人，查資料查到「好似」識咁樣，雖然互聯網的確可以學嘢，但對於實際運用為主既活動就唔係幾 work，例如行山就係其中之一，所以近年都出現咗唔少「偽行山專家」，做出不少「唔識扮識」既行為，到出事果事至知大件事。
山徑帶絲係德行定破壞? 長期爭論不休
----- 廣告 Ad -----
以下列舉一堆山友做錯事既重點
- 根本唔識: 由此至終都「從來」冇接觸過行山活動，行山郊遊完全係即興，有機會係一次性冇下次，當然唔會諗保育或者去讀山藝班啦，對行山既概念咪係「喺郊外、有條路、上樓梯、落樓梯、返屋企……」，當然冇準備喺個山度需要應對既事情，例如飲食、衣著……通常都要辛苦幾次至會意識行山唔簡單；
- 唔識扮識: 呢類人通常出現於00年代之後，可以由唔同途經去吸取知識，就係唔跟個認可既師父或山藝班學習，原因可能覺得「車，我夠知道咁咁咁啦，駛鬼去學咩」，又或者跟過老手帶隊行過幾次山，會覺得「行山?! 不外如是」，之後就扮老手去帶隊，呢類人如果唔係去難度較高既路線，可能一直都冇問題，但唔識死去挑戰能力以外既路線就會好容易出事，我地新聞庫專頁都做過唔少相關既case。由於「唔識扮識」，所學所知唔夠全面，的確容易出現唔少奇怪行為，例如其中一張圖咁亂咁爬樹，如果打斜生長既樹，以槓桿原理分析，力點 (人) 愈離開支點 (根部) 和力點 (泥土) 愈遠，力量愈大，加重泥土負荷，有機會整冧棵樹，唔係講笑，而樹都有生命，爬得多都會有損耗，咪以為人爬我爬冇問題，爬得多都會影響樹木生長；
- 識扮唔識: 有些山友，雖然經驗豐富，但就諗縮數，諗住點樣去方便自己既行程，玩得盡興，例如去x位露營 (冇咁多人爭位)、隨地起營火 (慳咗個營火爐、燒柴既慳埋燃料……)、亂開 short cut、玩完唔清場就走……用盡方法方便自己，但就唔會愛錫環境，好仆街；
- 一早識、但時代褪色: 舊世代既行山活動，唔駛顧及太多保育問題，玩法又冇絕對既啱同錯，但而家個年代，阿豬阿狗都可以去行山，又有一堆「根本唔識」、「唔識扮識」、「識扮唔識」既山友，因為各自既原因令郊外環境超出負荷，根本唔可以再用以前既方法玩，否則個場玩到爛晒，唔可以修復，就冇得再玩。我都知人係有「習慣」，覺得幾十年都係咁玩，點解突然間冇錯既會變成有問題，咪因為時代係會進步，世界不經不覺改變，而情況又不可逆轉，所以行山都要與時並進，為咗大家都有得玩，係需要讓步，做人唔可以咁自私。
對於以上四類人，小弟可以俾少少意見大家，希望大家玩得開心又放心，又可以顧及其他人既感受：
- 大家有份，齊做負責任的人: 個山人人有份，所以要諗下點樣玩法令對其他人同大自然既影響最少，詳情可以參考「Leave No Trace 野外不留痕」既相關資料，唔想睇得咁長篇，「自己垃圾自己帶走」都得掛；
- 遠離人群聚集既地區: 留意邊個區域熱門人多既，可以避免使用，分散人流，唔會一嘢玩到個埸爛晒；
- 做人唔可以自私: 你玩得，人地都玩得，所以唔可以剩係諗自己開心，要顧及其他人；
- 與時並進，留意野外資訊：對於野外既標準，每個年代都有唔同既睇法，所以都要留意一下近年既標準係點，標準唔同既原因都有好多因素，例如舊既標準開始有問題或者情況改變，改下未必係壞事；
- 從正途學習登山知識: 行山可以好簡單，亦可以好複雜，自學門檻高，亦未必學得全面，喺呢個年代我會建議大家報讀山藝班，如果想以「跟師」方式去學都可以，前題係師父「真係有料」、「跟得上時代」，而唔係是但開個群組約人行幾次山果種「冇料扮高手」，如果跟著果個類以明皇既人就多多命都唔夠死。
近期「山野‧新聞庫」專頁係收到好多破壞資料，但一直都冇登，因為登黎都冇用，疫情之下既市民又好似慣咗每個星期去郊區鬥迫、鬥惡搞，所以 admin 老大提議專注喺分享文章度，用心寫一篇既影響力可能更大呢。
相關新聞: 蘋果日報 – 流水響逼爆 遊客身貼身 8人闖露營地飯敍 大媽踩上樹打卡
原文載於 The hiking Database 山野‧新聞庫
----- 廣告 Ad -----
