今年4月，珠峰重新開放登山活動
尼泊爾今年4月重開山區，容許外國遊客檢疫及隔離後登山，點知不出幾星期，已發現有登山人士確診。來自挪威嘅登山專家 Erlend Ness，世界七大高峰已經完成咗5個，珠峰係佢第六個目標。
雖然挪威政府呼籲國民暫時唔好出國，但點解 Erlend 仍要堅持旅程? 佢話:「無計，因為而家去平好多，嚮導直情話可以免費帶我上山。」
Erlend Ness
Erlend 展開登山旅程六日後，發覺自己無力、發燒，原先以為只係高山反應，不過經當地醫生發現佢身體異常，結果由直升機送至加德滿都醫院診斷，結果證實確診武漢肺炎。Erlend 話:
「我進入尼泊爾時已隔離，仲做埋檢測先進入山區，所以呢個病絕對唔係我由外地帶入嚟。諗深層都係我自己無做足保護，如果多洗手、出入戴口罩，應該可以預防感染。」
----- 廣告 Ad -----
Erlend 相信係世界上最高海拔嘅確診者，佢而家已經康復，仲上網分享佢嘅經驗。不過英國 Sky News 就引述一名身處 EBC 嘅奧地利嚮導，佢話 EBC 而家有幾百名登山客及嚮導，EBC 環境擠逼又缺乏防禦病毒設施，萬一病毒擴散，後果絕對不堪設想，今年登山季節更可能提早結束。
珠峰基地營其實相當擠逼
尼泊爾當局就澄清暫時山上並無確診個案，究竟情況係點，可能只有山上嘅人先知了。
資料: Sky News
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。