梁美芬倡嘉頓山起lift 搭電梯上鳳頂不是夢?

本土研究社成員陳劍青披露，立法會議員梁美芬去信發展局，查詢政府有無計劃喺深水埗嘉頓山安裝升降機。意味住，梁議員對喺山頭起電梯，相當之有興趣！

嘉頓山 (原稱喃嘸山 ) 座落於深水埗鬧市，由巴域街美荷樓拾級而上，只要15分鐘。呢條唔夠一百米嘅路程，實在係都市人難得紓展筋骨嘅機會。而喺山頂之上，可以飽覽九龍西面海岸的景色，甚至可以睇到維港西部景色。(見《周末短遊九龍群山 嘉頓山》)

鬧市裏面，難得仍保留一小處大自然景觀，根本唔需要架床叠屋，興建乜鬼自動行人設施，令寧靜嘅山頭擠滿人群，亦剝奪咗大家接觸大自然嘅機會。

早幾年政府大灑金錢，各個區議會得到1億撥款「美化社區」。近年區議會嘅「小白象」工程 (相對政府郁下都一千幾百億嘅大白象)，由深井「燒鴨雕塑」，以至觀塘音樂噴泉，除了令人覺得浪費公帑外，亦大有「影響市容」之感。

政治人物為求「政績」，不擇手段，違反常理之餘，更有妖言惑眾之感。如今想到要喺山頭起電梯，簡直有破壞無建設！好彩，政府回覆梁議員，話未有計劃做呢項工程。

如今嘅議員創意非凡，遲下搭上鳳凰山觀日，搭地鐵去大帽山影雲海，絕對不是夢！

(正所謂「講時講唔好貼相」，梁議員嘅頭像，自己Google啦)

山雞 Facebook專頁

更多：
Fitz.hk Facebook 專頁
究竟發生乜郊野事
[自己山野自己救] 山頭很大 竟容不下公德心?
Fitz.hk Hiking 行山