西灣山

「西灣山拗柴應唔應該搵消防?」

是咁的，有朋友問我上呢條問題，我頭頂只有一堆黑人問號，然後出於自然反應問返佢:「睇情況啦，又唔知傷成點，又唔知天黑定日頭，又唔知咩天氣……」

結果，佢講咗個故事我聽。

西灣山拗柴記

成個故事雖然有好多犯駁之處，不過都可以探討下大家行山以及玩毅行者嘅心態 (以下情節經過少量整理)。

據講，呢個故事發生喺呢一兩年嘅樂施毅行者。話說有一支專業人士隊伍，搵到四位50歲左右嘅大叔代表出戰。喺好多人眼中，佢哋係「被上天照顧嘅一群」，所屬公司每年都可以籌到$36,000善款，保證每年都有參加名額，加上佢哋嘅界別唔多人行山，所以只要唔怕羞肯開聲，要參加呢項年年爆滿嘅慈善活動，絕對唔係難事。

咁講返佢哋嘅準備工作，大概情況都係其中有隊員平時有游水打波，就話自己體能OK，可以唔使操咁多; 又有話人要個個周末返教會，唔得會有時間操山。結果一條team四個人，喺北潭涌起步之前，都未試過一齊行山。

資料圖片

鏡頭一轉，講到佢哋順利起步，去到浪茄灣，緩緩踏上西灣山嘅山徑。就嚟去到山頂涼亭一段，有隊員突然哎吔一聲大叫，話自己拗咗柴。當時情況係咁:

1. 佢哋喺西灣山山頂涼亭休息，食水充足
2. 受傷隊員話拗柴時聽到有響聲，但腳腕未見腫脹
3. 除咗受傷隊員外，其餘3位隊員體力充沛，身上裝備齊全，4個人每人一對行山杖
4. 佢哋嘅位置，無論係落番浪茄到東壩，定係去西灣亭，距離同路況都差唔多。都係有一堆樓級，少少山路咁

西灣山山頂涼亭雖然唔係檢查站，不過眾集一大班參加者，有幾個有急救知識，睇過傷者情況後，都力勸拗柴大叔，慢慢行落大浪西灣檢查站，由大會急救員檢查下，再決定下一步行動。佢哋相信，憑住隊員嘅攙扶，以及幾支行山杖，要慢慢行落山應該唔會太難。而其他三位隊員，亦希望就算拗柴大叔退出，都可以繼續行程。

山頂涼亭

----- 廣告 Ad -----

好可惜，拗柴大叔力排眾議，話:「我要call~~ 消~~ 防~~ 員!」

又唔知邊位隊員話，要尊重傷者決定，仲要求全體一齊等消防員。

一行四人喺西灣山涼亭等成兩個鐘，辛苦嘅消防員先可以由西灣亭行到西灣山頂。而全體隊員又要用兩個鐘陪傷者去西灣亭上救傷車。前後無咗四、五個鐘。

不過，人間慘劇仲未結束。當去到西灣亭嘅時間，有隊員又話擔心傷者情況，話要跟上救護車，決定退出。

結果，一team四個人，去到 CP1 大浪西灣，只係得2個人可以報到。而呢2位隊員相依為命完成最後90公里路。

呢個故事教訓我哋:

1. 揀隊員好緊要，揀隊員好緊要，揀隊員好緊要 (重要事要講三次)
2. 四人一隊，最少都要搵一至兩次，full team出嚟操下
3. 受傷係活動嘅一部份，大多數情況都可以成功處理，真係唔係好下下call消防員

樂施毅行者係隊際活動，大家真係要花時間了解各個隊員。

Fitz連結: https://fitz.hk/?p=124650