[毅行者] 識揀，一定揀個「毅行full cert男」做男友

圖片來源: 囉嗦大叔

先要多謝陳伯 Yiu Kwong Chan 同 壞人Ryan，佢地「識揀」系列嘅文，小妹睇完學到好多嘢。啲friend 仲話我甩咗少少港女味。係嘅，少少都好過冇，我會繼續努力。

Anyway，同一類題目，不如試下用女性視角睇下?

媽媽自小教落：「專注嘅男人最charming。」其實做得運動嘅男士，個個 package 都好 competitive。雖然平時路跑已見唔少師兄 man 到爆，但講型，我始終都係 prefer 專心上山落山嘅師兄s。

而行得毅行嘅，就算唔係十幾個鐘完成嗰啲外星人，點都要練下山，操下體能吧? 所以一定唔駛擔心佢哋嘅健康，佢哋分分鐘仲緊張過你。就算身型「未如理想」都自信搭夠。我試過遇到幾個大肚腩師兄，著住嗰種勁貼身嘅賽衣，三十幾度滴著大汗默默地上雞公山。到頂時見到佢哋個笑樣，真係 sweet 過維尼熊搵到蜜糖呀!

而當中嘅 cream of the cream 一定係「full cert男」啦。

四人一起衝線，方能獲得毅行者 “full cert” 圖: Oxfam Trailwalker Hong Kong Facebook

要知道，毅行最難玩嘅地方，係個個 CP 都係要四人八腿齊齊過。過去幾年聽得太多太多毅行故事：有人為追成績逼抽筋拗柴隊友剪帶，亦有人為趕時間唔俾隊友食嘢等等。喺一個人性陰暗面盡露嘅情況底下，仍然有義氣地照顧好隊友、照顧好自己然後齊齊衝線嘅人，一定係肯花時間花心機就人，EQ 亦有番咁上下。對住另一半自然亦有耐性得多啦。

----- 廣告 Ad -----

咁行幾耐嘅「full cert男」 最 charming? Come on，求學不是求分數。成績真係唔係重點，但如果你一定要我揀嘅話，我會prefer一個行48個鐘嘅多啲囉。受到48個鐘嘅折磨都唔放棄，呢啲簡直嫁得過啦。

仲有幾日就係毅行者起步，先預祝各位師兄師姐「如願以償」，終點見!

PS: 嗱，我以上唔係講緊為追時間會推撞人嗰啲。冇品呢家野無論係山跑定路跑、有冇 full cert 都好，幾型都係冇得救嘅。

編按: 呢四個都係Full Cert男，有無邊個啱心水? 小編可代為轉告。