水多人不怪? 行山帶水有學問

行山要帶幾多水，夠飲又唔會孭餐死？

呢個星期日，天氣大有炎炎夏日嘅感覺，日頭氣溫超過三十度。身邊唔少行山友，一時無留意天氣報告，當堂「中伏」！（按：「伏」本意係天氣最熱的時期。）

行山炎夏裝備，其實講乜都無用，最緊要一定係水！不過，對行山新手而言，雖則知道水係好緊要，但要帶幾多先夠？首先要明白，帶幾多水要考慮以下幾個因素：

1. 路線：路程越長就要預備多啲水，條路越難行亦都會飲多啲。

2. 天氣情況：參考書話，氣溫超過33度，濕度超過80%，就會影響身體排汗機制，必須要飲水以調節體溫。就算唔係33度咁極端，25度同30度都好大分別。

3. 身體狀態：體能好自然需要較少水。行山前睇下自己嗰排fit唔fit，千祈唔好高估自己，有一段時間無運動就好自為之。

山澗溪流嘅水，我就唔會亂飲。

4. 中途補給情況：我只係指行山途經的士多店舖，補充飲用水嘅地方，並不包括溪澗河流。山野流水有好多睇唔到的污染，除非你會行山帶cook set煲水。

5. 負重能力：科學小常識 — 1公升水=1公斤。拎多1公升水就要多1公斤負重，2公斤就要孭多2公斤……如此類推。而負重又會直接影響你嘅表現，令你行得更辛苦。死味？

講咗咁多，間中聽到有人問：「咁鬼多嘢要諗，咁有無一條方程式可以計到行山要帶幾多水？」

Sorry囉，我唔係圖靈（Alan Turing），無佢咁聰明。我嘅做法係，憑經驗。以我自己為例，一般情況我都以每10Km帶1公升水為基準，條路辛苦啲會加啲，天氣熱啲又加啲。

例子：

麥徑2段全長14公里，以我基準應該帶1.5公升。但西灣山真係唔係人咁品，山頭又焗又斜，咁預多0.5公升；若果天氣熱又加多0.5公升。不過，大浪西灣有茶水檔，可作補給，所以又可減去呢段路嘅5公里。所以，我就帶2公升就可以。(講多一次，每個人嘅體能同飲水習慣唔同，完全要憑自己經驗。）

1500ml + 500ml（西灣山）+ 500ml（天氣熱）- 500ml（大浪西有補給）= 2公升

大浪西有幾間茶水檔，係行山補給站。

注意：

1. 救命水：行山無論幾唔夠水都好，都要留番一小部份作為救命之用。遇到迷路、隊友不適等等意外，嗰一樽水隨時解救你同你嘅隊友。
2. 水樽用完唔該拎返出市區嘅回收桶。
3. 起步前飲番夠本（我會自隊500ml寶礦力先起步)。

更多：
打破謬誤-要認真思考的行山常識
山雞其他文章
Fitz行山文章