美國大媽行山陷險境 只因打錯一個電話

Becky Ethington (左)

美國猶他州嘅 Becky Ethington，早前去到當地嘅 Fernwood Park 行山，呢個森林公園佢行到好熟，留低好多腳毛。不過正因為佢太過老定，呢日行下行下，竟然蕩失路。身上嘅水又唔夠，又就嚟天黑，佢就打電話求救。

警方收到消息，派出大批救援人員上山搵人，仲 call 咗一部配有紅外線熱像嘅直升機搜索，而 Becky 嘅親友及同事亦喺公園候命，希望幫到手搵人。

第二日朝早，Becky 沿住溪澗順利行到公路，搵到救援人員，令大家鬆一口氣。

打錯一個電話

一切問題嘅開端，係因為 Becky 打錯一個電話。原來，Becky 發現有問題嘅時候，拎起電話撥嘅號碼，並唔係警察熱線，而係打返屋企，再叫屋企人報警。其後 Becky 電話唔夠電，已經唔可以同警方聯絡。

Erik Bornemeier

負責搜救嘅警員 Erik Bornemeier 話，其實 Becky 只要當時打去警察熱線 (美國係911或112)，佢乜都唔使講，警察已可透過手機嘅 GPS 訊號，知道 Becky 所在位置，咁救援人員就可以即刻上山搵人。警長仲話，Becky 呢次做錯幾件事，令佢身陷險境:

1. 有問題第一時打咗返屋企，而唔係打畀警察
2. 行山前要檢查電話有無足夠電力。呢次 Becky 部電話唔夠電，而當時山間嘅溫差好大，令電話更加耗電，令 Becky 最後唔可以再打電話
3. 保留手機嘅電力，行山唔好玩手機
4. 求救之後，停留喺原地，唔好周圍行。Becky夜晚喺山上走來走去，令救援人員真係搵唔到佢

香港留蹤服務

睇香港政府網頁，就搵唔到警察可以用999熱線追踪GPS位置。不過行山要留蹤，其實仲有好多方法:

• 50222遠足短訊留蹤服務: 行山時將沿遠足徑見到標距柱上的獨有編號，以短訊發送至指定號碼「50222」，報告其位置所在。舉例說，發送號碼「M001」，表示遠足人士位處麥理浩徑第一個標距柱。一旦遠足人士失蹤，搜救隊伍可利用在「50222服務」系統中儲存的資料，加快搜獲失蹤者。

• GPS遠足留蹤服務: 先安裝漁農自然護理署的「郊野樂行」或保安局的「保安一站通」流動應用程式，每次遠足前啟動程式及其「遠足留蹤服務」功能，便可藉着 GPS 自動記錄你的位置。有關數據將儲存於服務中心，一旦遇上緊急情況可翻查數據，加速搜救行動
• 行山一定要拎哨子，遇到意外可發出求救訊號: 在一分鐘內，連續發出6次長訊號，停頓一分鐘後，重複同樣訊號，不要中斷直至有救援人員到達為止。(即使已被救援人員從遠處發現，也要繼續發出訊號，使救援人員知道求救者之正確位置。)

一句到尾，行山迷路最緊要定，仲要有所準備!

資料: Deseret News、香港政府一站通