行山意外頻生 專家倡立法規管係咪可行?

行山意外一單都嫌多。不過，疫情之下市民蜂湧走入郊野，唔少人更加越級挑戰高難度山徑，令行山意外大增。

消防處嘅救援數字，於2020年上升近兩倍: 2019年的攀山拯救事故有215宗；2020年初步錄得602宗，比前一年上升1.8倍。(來源:《HK01》)

山難頻仍，除咗因為多咗市民行山，亦與安全意識薄弱有關。多年來，一眾關心行山安全嘅朋友已透過不同渠道呼籲大家量力而為，但仍有人冥頑不靈，置自己同救援人員於險境不顧。到最近，一宗發生於大嶼山鳳壁石澗嘅致命意外，終於提出最嚴厲嘅解決方法。

立法規管行山活動?

《蘋果日報》就「鳳壁石澗」意外，訪問行山專家黃智仁:「市民真係要量力而為，如果唔係政府立例監管，會等於攬炒。」

呢個講法，絕非危言聳聽。同其他國家相比，香港嘅山嶺當然屬「小矮人」級別，海拔1000米以上嘅山峰一座都無，但仍然有好多險境，包括漁護署所列出「17個郊野公園高危地點」，「鳳壁石澗」就位於屬於「高危地點」之列 (南大嶼郊野公園狗牙嶺一帶)。雖然呢啲高危地點會豎立政府部門嘅警告牌，但市民如果願意以身犯險，大家仍然可以自由進出，通行無阻。

圖: 政府新聞處

既然政府告示毫無阻嚇力，以政府邏輯，要降低意外數字立法規管呢一招，絕對可以「快、狠、準」。至於點樣立法，參考外國經驗，可能有三個方向:

1. 將郊野地區嘅「危險地帶」列為遊客禁區，並以圍欄封閉出入口。以沙螺灣村一例，起道閘已可阻止大家前進；未能封閉所有通道，就實施嚴厲罰則並加以巡邏 (見pt.2)
2. 參考台灣等國家經驗，於行山地點列為管制區，有足夠行山經驗及知識嘅市民 (如具有一級山藝證書)，就可以申請「入山證」進入。政府派員到上述地方截查市民，若有違規者，即時發告票，位位$5000。
3. 實行「救援用者自付」方針，徵收求救者成本開支。以每部直升機、每位救援人員計算開支。根據台灣經驗，召援一次直升機約港幣20萬。大拿拿十幾廿萬，相信會令唔少人更重視行山安全。

話雖如此，相信大部份香港人 (包括筆者) 都反對任何形式的限制，上面規例能否成功立法已是大問題；再者以政府部門執法能力，立法後亦未必可以圓滿執行。雞公嶺越野電單車肆虐咁多年，最近先有人上山做嘢……