[西灣觀星台] 大浪西灣的「多嚿魚」

大浪西灣可以話係香港其中一個觀星熱點，因為面對西貢海，可以避開光害影響。而且人煙稀少，環境寧靜。今年三月初，大浪西灣將開放一項新設施，叫做「西灣觀星點」。

漁護署介紹，呢個設施「西灣觀星點」，距離西灣營地五分鐘。佢哋認為西灣係一個適宜觀星嘅地方，營地使用量較少。而且，項目同建築署合作，建造時顧及附近嘅環境生態，絕對無砍伐樹木。

根據網友拍攝嘅相片，「觀星點」只係喺一個平地之上起一座高台，然後喺上面放張長椅。漁護署話呢張椅係依據人體工學設計，好舒服咁話。

網上流傳的觀星台

依照筆者嘅搜查，發現2015年香港大學建築系有個叫「星下建築 Among The Stars」嘅比賽，比賽主題係大浪西灣嘅觀星設施。咁啱得咁蹺，得獎作品又同漁護署座「觀星點」有幾分相似。

「星下建築 Among The Stars」得獎作品

有無抄襲有無山寨，我哋星斗小市民識條鐵咩。之不過，大浪西灣係香港勝景，海灘嘅景色中外聞名，其實唔需要咩設施去吸引市民。更何況，睇星最理想嘅方法就係瞓喺地下睇。大浪西灣個海灘咁大咁靚，使鬼要起張長櫈咩!

鰂魚涌曾經有座用30萬起嘅「不能避雨亭」，捱咗兩個月就拆。呢座「觀星點」又唔知可以維持幾耐呢?

馳名中外的「不能避雨亭」

Fitz連結: https://fitz.hk/?p=114250