郊野公園新設螢幕顯示屏，市民一面倒unlike

《財政預算案》話要花5億幾「優化」郊野公園，納稅人嘅錢點使到而家都未知，不過有啲郊野公園嘅新設施就令人覺得倒錢落海。

漁護署最近於荔枝窩、北潭涌同城門三處，設置上圖呢啲「螢幕顯示屏」，提供當區實時天氣資訊，以及播放政府宣傳短片，提示山友遵守山系禮儀同防疫措施等。

市民反應: 倒錢落海

喺發佈消息嘅 郊野公園教育活動計劃 Country Parks Education Programmes Facebook專頁 ，留言可謂一面倒，搵個讚嘅留言都無。大家嘅反應，都覺得屏幕「多嚿魚」、破壞景觀等:

• 行到上山先睇天氣 仲要去到驚你唔知介紹埋附近景點……
• 其實d電子屏幕同郊野公園真係格格不入，如果有資源，不如做多d廁所優化工程啦，衆多廁所衛生同設備真係不堪入目
• 現時幾乎人人都有智能手機，大家都可以用自己手機查看最新天氣情況，這個裝置是否多此一舉?
• 不如安排多d人手去那些非法餵飼野生動物熱點，例如金山路，加強執法
• 高分低能坐冷氣房好心做壞事系列，請公開建造費，維修保養費，電費，軟件圖像及更新設計費，是否外判中資公司？ 是否已徵詢民意，環保組織及行山團體意見?
• 請問幾時有$及行動阻止爬山電單車四圍剷山?

唔少人亦提出顯示屏會造成光污染，署方亦解釋過，電子顯示屏會喺每日太陽落山之後自動關閉，唔會對人類及動物有影響。

官員嘅管治思維有缺失

長期關注本地社會事務嘅 本土研究社 Liber Research Community，就用官員嘅管治態度去剖解呢個屏幕，佢哋話:

「顯示諗得出將呢件室內設施擺係室外嘅官員，明顯唔係從享受同欣賞郊野嘅行山客角度諗嘢，而係諗緊引入大量遊客去鄉郊深處，將市區 mass tourism 概念套入郊野，顛覆郊野公園設立原意，整個規劃極可能為郊野帶來浩劫。」

希望有關方面可以懸崖勒馬，下次興建呢啲設施之前，諮詢下市民先。