與朋友被困於咖啡店避雨，其中一位朋友問：「你話呢，如果我哋見好天走咗去行山，跟住下晝突然落大雨，點算好？」
我諗都唔使諗，標準答案一定係：「走，有咁快得咁快，快啲落山!」
或者有人會話我「懦夫」、「無膽鬼」。不過，大家睇完下面條片，就知落大雨並唔係講玩……
片段係我喺網上搵到，係麥徑邊段我真係睇唔出（我估唔係第三段，就應該係第四段）。而片段入面嗰兩位朋友，練習得毅行者，都應該唔係新手，但面對暴雨，仍然無計可施。嚴重啲講，直頭係坐以待斃，因為只要佢哋暫避嘅地方有更大嘅洪水，佢哋只能被水沖走。其實喺大自然之下，人類嘅力量其實微不足道，大家真係唔好諗可以挑戰囉。所以，一遇到壞天氣，就唔好諗，用最快同最安全嘅方法落山！
其實而家香港天文台已經有天氣提示服務，大家行緊山亦要留意天氣情況。上到山頂，打卡之餘，亦可以睇下天文台嘅天氣報告。就好似呢次兩點幾開始落雨，但天文台已經喺下晝一點幾有提示。個幾鐘頭，已經可以撤退到安全地方咯。
----- 廣告 Ad -----
（我山雞死唔斷氣，講多句。話說小弟十六七歲，單拖一人上馬鞍山側之大金鐘。到了大金鐘山腳，突然風雲變色，傾盆大雨。情況就好似上面條片咁，山路變成河流。我一條乳嗅未乾嘅小朋友，就嚇得只有大叫救命。好彩，咁蹺有幾位休班消防隊聽到，帶番我落山……）
落雨行山備忘
- 不時留意天文台天氣報告
- 盡可能盡快落山，或找安全地方避雨
- 如選擇繼續前進，注意山路濕滑，應盡量行草地，避免行沙泥地或石路
- 盡量保持身體乾爽，以免著涼
- 落雨時仍記緊飲水及進食
麥徑四段俗稱「長城」一段，我落雨就最怕行。因為啲石頭好滑。
就算有對 Gore-tex 鞋，雨水都會源住你對腳滿入鞋籠。呢招用膠袋幫對腳包膠，都不失為好辦法。
保持身體乾爽，防水風樓必不可少。同時重要，就係背囊套。
----- 廣告 Ad -----
更多：
Fitz Facebook專頁
[興烚烚] 炎夏行山救命法寶
山雞@Fitz.hk
Fitz Hiking 行山
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。