尼泊爾秋季攀山季正式揭開序幕，位於喜馬拉雅山脈、海拔8,163米的世界第八高峰馬納斯盧峰 (Manaslu) ，將迎接史上最熱鬧嘅攻頂季。尼泊爾官方數據顯示，今年 Manaslu 秋攀獲發許可嘅外籍登山者人數刷新紀錄。自9月16日起，共有來自39支隊伍、多達466名外籍攀登者 (包括342男、124女) 陸續由大本營出發攻頂，為尼泊爾政府進帳高達144萬美元。
本季已釀兩死
熱鬧背後，高山危機已經默默浮現。本季第一宗死亡個案發生於9月初，死者為一名年僅20歲嘅尼泊爾搬運工人，被發現喺 Base Camp 嘅帳篷內失去生命跡象，懷疑係因帳篷內置有發電機或通風不良導致窒息，事後亦因惡劣天氣一度無法即時安排直升機運走遺體。
到9月17日，山區再傳出第二宗噩耗。一名50歲嘅新加坡籍攀登者 Lau Wee Seng 喺完成適應性訓練、由 Camp 2 下降返大本營途中感到身體不適，隨後不幸遇難，成為今季首位喺 Manaslu 失去生命嘅外籍登山者。
雪上加霜嘅係，有尼泊爾雪巴登山教練，發現 Camp 4 至 Camp 2 之間發生大雪崩，大量粉雪形成巨型雪雲，將登山固定繩 (Fixed ropes)吞噬。教練在社交媒體直言，好彩 Camp 3 以上剛好冇人在場，先至冇釀成更大規模嘅傷亡，坦言今次大家真係「純粹靠運氣」先避過一劫。
Fitz 編輯部
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。