東京奧運實施嚴密防疫措施，選手除咗出入比賽場地，只可於選手村生活。換言之，東京雖然係美食多多，但佢哋只能幫襯選手村餐廳。至於選手村供應嘅菜式，亦因疫情禁絕魚生、壽司等食物，全部要經過煮熟先可以上枱。
負責選手村饍食嘅山根勉解釋，佢哋每日要預備48,000個餐，應付村內18,000人需要，所以西式同日式菜式一共有700個。山根先生話，佢哋希望呢啲菜式可以令國外選手認識日本文化，所以唔會供應高級餐廳嘅山珍海錯，反而大多由民間徵集，以拉麵及烏冬為主要食材。
大媽三文魚拉麵
圖: BBC視頻
59歲西村洋子嘅三文魚拉麵，被選中為其中一項奧運菜式，呢款拉麵以烤三文魚、淮山、蒸雞肉、毛豆等為配料，再加入新鮮桃做嘅醬料。
西村洋子話，呢款菜式嘅構思，係想配合東京炎熱天氣，令運動員感到清新嘅感覺。
----- 廣告 Ad -----
除咗大媽拉麵，選手村仲會供應和牛同天婦羅呢啲著名日本料理。
資料: 法新社
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。