長生蠔 (Magaki) 係日本著名海產，肉質肥美，味道鮮甜，屬冬季美食，無論做刺身同天婦羅都屬上級之選。最近東京灣收割咗14噸長生蠔，不過唔可以放上餐桌要全部棄置，因為佢哋嘅生長地點，係今次奧運划艇比賽場地。
《BBC》報道，奧運前夕「海之森水上競技場」用來防止海浪影響運動員嘅浮板無故下沉，當局經調查後發現，原來有大量生蠔依附其上。生蠔會破壞設施，亦有機會傷害參賽運動員，但因為呢度係日本全國唯一符合國際標準嘅划艇場地，所以就算問題多多，都唯有積極清理生蠔。結果有關方面動用超過128萬美金 (約1,000萬港幣)，於5.6公里海面，清理約14噸生蠔。
而可惜嘅係，生蠔雖然有價，不過當局話因為未有衛生證明，唔可以食用，所以要將佢哋全數棄置。
此外，「海之森水上競技場」除咗生蠔為患，7月份氣溫可以高達40度，亦令選手及觀眾非常疑慮。
----- 廣告 Ad -----
資料: BBC
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。