我嘅全馬同半馬從來都無一張亮麗嘅成績表，最佳成績已經係2017年嘅 “皇者之戰” 跑3:41 同 “Asics 大埔半馬” 跑1:45，對於一個10K跑42嘅跑手，呢個成績乏善足陳。曾經去大阪同台北旅跑，睇下有無分別，但兩次出發前都有傷患，成績可以用一敗塗地去形容。見到其他跑友臉帶笑容完成，而自己就飽受抽筋之苦，中後段都係捱返終點，隻腳固然痛，玻璃心更痛。
四屆波馬冠軍馬 Bill Rodgers 曾經咁講: “The marathon will humble you. But the turth is, sometimes it will do more than humble you. Sometimes, it will break your heart.”
Boston Marathon 1979 圖: The Middletown Press
呢位大師嘅高見喺2018年”皇者之戰”中，再一次俾我用實踐去証明。果次我跑咗一半就抽筋，我一拐一拐咁繼續，痛楚令我有絕望嘅感覺，亦令我明白天長地久四個字唔單止可以形容愛，亦可以用嚟形容痛苦，喺剩下半程我不停問自己係咪唔應該再跑馬拉松，不過我諗唔到答案，因為我真係好痛。
----- 廣告 Ad -----
肌力不足係長跑抽筋主因，所以我將跑量增加到每星期約8OK，可惜因為各種原因，我只係每日跑兩課嚟斬件凑夠，長課依然欠奉。
我同”豐山跑”教練KFC及同學仔參加10月4日倫馬虚擬跑，佢喺賽前兩星期安排一次30K長課，路程係來回沙田大埔一次。我當日最初21K係順暢嘅，之後果9K有啲跌速，但我自己仍然覺得唔錯，久違嘅信心好似返咗嚟。
10月4日嘅氣温超過30度，下畫4點，我哋由馬鞍山運動場出發，經沙田雙橋、科學園到大埔大王爺廟，然後返回馬鞍山，來回兩次。我想保守啲，所以約定經驗豐富嘅B哥以5:15左右披醒一齊跑。
世事真係估佢唔到，一起步就發現果個倫馬App啟動唔到，而我隻運動錶突然失去智能，成個錶面黑哂。當時好徬徨，邊跑邊搞，結果個App救唔番，我放棄咗佢，而隻錶就醒番，但已經係5分鐘之後嘅事。攪咗咁多嘢，我已經忘記咗同B哥嘅協定，以4:50披醒向前邁進。高温加上高速，部車10K後水滾，對腳一直喺抽筋邊緣直至終點。我無勇氣同人講完成嘅時間，不過所有同學仔都見到，當晚雖然筋疲力盡，但我一夜難眠。
倫馬虛擬跑對於我來說是一場惡夢 攝: Lam Sport Photos
教練係 Hoka 大使，所以我同啲同學仔參加 Hoka 半馬係好合理嘅事，賽道由西貢北潭涌起步到東壩，然後返回北潭涌，呢條路上落斜多，有魔鬼賽道之稱。11月15日，天氣清涼，我哋8點15分起步，今次無需下載專用 App，而我隻高智能錶無跪低，所以我可以專心跑。
Hoka半馬 – 虛擬起點
----- 廣告 Ad -----
跑 Hoka 半馬啲火番晒嚟
我初段跟住B哥同埋”山跑英雌”美英，當時我哋披醒5:30左右，但我覺得呼吸唔順暢、對腳又好似半夢半醒咁，原來我起步前顧住吹水，熱身嚴重不足，我叫自己冷靜、忍耐、切勿喪衝。大約2K後，我覺得自己開始適應，於是加速至4:30左右，可能因為當日天氣好，加上我之前休息足夠，所以我能夠保持相約速度返到終點，以一個自己滿意嘅時間完成(1:38:13)，睇下隻錶，均速4:39，攀升超過33O。
北潭涌去東霸是出名的魔鬼賽道
好難得最後2K仍有力加速
果日遇到一個同年齡組別跑友，我哋之前好幾次同台領獎，完賽後同佢寒暄幾句，分手前佢同我講: “下次頒獎台上再見”，我對佢嘅豪情壯志有啲感動。疫情，你幾時先會離開我哋?
人生好似跑馬拉松，需要訓練同準備，當中要兼顧嘅事情好多，我哋有時會犯錯同失敗，但只要堅持，一定能夠到達終點，只要肯改善，我哋會做得比上次好，何況只要盡力，雖敗又如何。
