青山公路青公。。。一條全名叫要做青山公路嘅公路
青公。。。一條大部份跑友夢想中練跑嘅道路 (好似係。。)
青公。。。一條可以練速度又可練斜路嘅地方
青公。。。一條我聽得多,但從沒有跑過嘅傳說秘道
青公。。。一條打造好多跑友跑得快過小明嘅道路
青公啊。。。青公啊。。。

好耐之前,見好多跑友都會去青公練LSD、Tempo之類。而我都有諗過跑一次青公,睇下係咪真係一個咁好練功既地方。但本人實在太過懶,唔想坐車去咁遠跑,所以就遲遲冇去到。有天忽發奇想,覺得與其坐8、9蚊巴士去,淨係跑荃灣段至屯門段咁短時間,有D蝕。咁不如就玩大D,黎一個71回歸全青公去爽丫丫下。

跑前都有詢問過跑友既資料,知道最惡頂係元朗段至古洞段,所以已經做好心理準備。如何惡頂?有興趣既就繼續睇落去丫。青山公路全青公大約有56K:

青山道 > 葵涌段 > 荃灣段 > 汀九段 > 新汀九段 > 深井段 > 青龍頭段 > 大欖段 > 新大欖段 > 掃管笏段 > 青山灣段 >新墟段 > 嶺南段 > 藍地段 > 屏山段 > 元朗段 > 潭尾段 > 米埔段 > 新田段 > 洲頭段 > 古洞段

因為呢次全青公我唔擔保會再跑,所以我去到每一段都想影底個路牌留念下。同時可以鼓勵自己有動力Keep 住跑到下一段。但太專注跑,我MISS左幾個路牌冇影到。青山公路早上7點由嘉頓出發,青山道去荃灣段難度不大。除左葵涌段全程上斜外,都好好跑的,但最唔開心竟然係。。。天陰!!!


我最愛熱到溶既天氣跑步,見到天陰真係有少少不悅同失望。。。青山公路跑完荃灣段終於到左跑友夢想大道 – 真。青公!

而呢個時候,原來個天都冇離棄過我 – 烈陽出來了!!!!!

心情即刻由谷底彈到上山頂, 拿拿林走去荃灣西約體育館補補妝 (其實係搽黑鬼油,唔搽會變關公),就慢慢享受呢條路。青山公路汀九段到青山灣段,九成路都係沿海,仲可以遠眺渣馬三橋景色,烈陽加上沿海風景真係一絕,可以邊慢跑邊欣賞咁靚既風景之餘,身體同心靈上都得到極大既滿足同放鬆。呢條路有上斜/落斜/暗斜,練跑真係一流,難怪咁多跑步朋友酷愛青公。沿路亦見到不少跑友享受被青公蹂躪緊。青山公路青山公路沿途好多沙灘,聽聞十多個,但我就只影左呢度,因為有我個BEACH字。(快黎APPORACH我啦 XDD)青山公路去到呢段都已經10點11點。。。個太陽雖然唔係出得晒, 但都已經夠曬死我十次,跑到轉車站真係頂唔順要搵樹蔭遮下,心中叫左一句 : [ 媽呀。。我知錯啦!下次我唔敢啦! ]。以前細個成班友正午十二點,沖去踼幾粒鐘波都唔覺有問題。但今次真係曬得太勁,如果唔係有支水係身,我人生就會第一次中暑。青山公路青山公路當我以為過左呢條乾煎路,諗住有好日子過時,原來FINAL BOSS係新墟段到元朗段!!跑到呢段時間係1點到4點零,係烈陽得最甘既時間。因為成段係冇瓦遮頭,即係由汀九段到元朗段,我有成7個鐘既時間,乾煎自己條生咸魚,真係身上咩毒都可以曬死晒,我終於可以脫毒啦!! 爽晒!!

我呢家諗返都覺得自己唔係跑緊青公,而係在青山兜緊圈。。。。

唔係跑呢段路,我真係廿年都唔入黎屯門一次,感覺好新鮮,好似大鄉里出城咁。連妙法寺都未見過,仲走去問人呢座乜家科黎。個阿嬋好驚咁答我,可能佢以為我係偷渡落黎都唔定。青山公路到最後潭尾段到古洞段,如果大家唔係食飽飯冇野做,都唔好跑呢度,因為。。

  1. 極多貨櫃車,塵多不特止,仲需要瞻前顧後,迫住你做大師父。
  2. 好多劏車場,有好多狗。(本人怕狗。。。)
  3. 條路好長、好悶、冇風景,除左車就係車,跑到想訓咁滯。好彩係元朗買左兩包Gel醒醒神,唔係我連力都冇。
  4. 新田段好多水貨佬截綠的,極煩。

基本上呢度要跑下停下,好似玩ONLINE GAME LAG機咁CHOK CHOK 下。個頭成日周圍望,忙過你返工覆E-MAIL,跑完第二日條頸好攰,我懷疑都係因為擰得太密。

千辛萬苦,終於跑到終點 – 古洞段。大家見到我個樣都已經半死咁滯。。。青山公路如果大家好似我咁,喜歡自虐、乾煎、做人體吸塵機,可以跑一次全青公。。。但免得過我都唔會再跑潭尾到古洞段,因為真係悶到發瘋。

打劫完青公,佢成副身家得$56。哈! 原來佢都係死窮鬼黎!!跑完我渣渣淋返去搵周公捉棋好了!青山公路

更多:
一生起碼瘋一次
[This is Art] 畫公仔要畫出汗!
Fitz Running 跑步


文章為作者意見,不代表Fitz立場。

歡迎投稿: https://fitz.hk/contribute/

廣告
沙灘
今年渣打全馬,又流血又抽筋,決心來年要輕鬆完賽。從練習超長距離慢跑中,發覺可以清洗心靈,進行靜心,尋找自我,令自己常處於平靜狀態,活在當下。