屋企出發徒步去沙灘?

由

2017-09-07

Fitz > 運動 Sports > 跑步 Running > 屋企出發徒步去沙灘?

我住香港，但唔係住淺水灣……

喺香港住地鐵站沿線，直接跳落海嘅機會係絕對大過去沙灘 (呢個亦解釋到點解啲日本或外國片，自尋短見好多時係一步一步行入過海，多過香港「濮」一聲跳落水，真係死都要方便)

多得 HNR 不斷出跑步路線，我決定跑鰂魚涌上龍脊大浪灣路線，隨行隨跑，隨改路線。但出門口前，不斷有把聲話：「跑返平時炮台山、天后廟道，最多跑埋金督馳馬徑，夠兩粒鐘叫長課咪返歸囉。」

另一邊就有幅圖畫走出嚟，去大浪灣啦，難得可以跑步去沙灘，呢個亦係我家姐一家夏天必去嘅地方，而且有地方沖身，可以瞓一下沙灘。

生活以來不同嘅智慧又嚟衝擊我

「有機會行一條不同嘅路，就會有不一樣的風景。」

好，當我出門口，我決定沿海邊向鰂魚涌跑，北角認真係烏煙瘴氣，香港宜家最適合搞「地盤跑」，度度都係地盤。

我耳仔同時係聽緊 DAVID PAWSON 嘅 UNLOCKING BIBLE，約翰福音，跑步聽道係一件好正嘅事，唔會有嘢騷擾。

鰂魚涌海濱公園我喺東廊見得多，我老豆都經常跑呢條路，但我從來都無跑過，然後眨眼就去到滅火輪，再經上年渡海泳個絕望位，往三家村碼頭對出，再去避風塘見東龍島原來呢度有船出，最後跑到盡見廟轉上亞公岩道。

上得山就唔係人咁品，尤其柴灣道，一路上見唔少車衝緊落山。中段行人路會中斷，所以幾慢都要留力搏命跑，唔係就會俾車夾死。去到石澳郊野公園口，諗諗吓去唔去龍脊，其實呢條老少咸宜嘅路，我係無行過，好，成條路都無試過，唔爭在。

呢條路最大特色係星期六中午時間，上落山嘅全部係年輕外國人，靚仔靚女，乜呢條路真係咁 chill 咩？

上到打爛醋埕山，天氣唔好，煙霧瀰漫，哥爾夫球場小屋最浪漫。哥爾夫球其實無問題，但哥爾夫球專俾有錢人玩先係問題。尤其香港地方細，返內地打係更適合，哥爾夫場變哂露營場地的話，我都可以轉做露宿者，sorry 露營者。

最後折返返大浪灣，行完一大段山，除鞋行落沙灘，啲沙幼到踩落去好似人手按咗一餐，如果有張墊，真係睇埋型人細路滑浪之後，可以即時瞓一個晏覺。

香港有佢獨特嘅海岸線，駁上山，又落返海，成條路我無行過，未試過完全唔坐車就上到山，完全唔坐車就去到海灘。

香港真係一個「生命滿希望、前路由我創」嘅地方。除咗要過海，幾乎所有地方都可以用腳行去。
如果要珍惜呢個地方，行多啲。

寫緊篇文嘅同時，另一個徒步去嘅沙灘白腊又俾人堆土堆沙，香港唔止小店會無，海皮又無，沙灘一樣都會無。

(同場加映：以前打風必定訪問農民講收成，宜家只係得無意義嘅碼頭食風片，我將獨家嘅二澳農作社風球破壞後相俾大家睇睇，負責人李立航留一句：「在苦澀中見堅忍，不是壞事，隨天。」)

香港人，共勉之。