[心晴跑] 隊際的熱血與老土

圖: (左至右) HNR 阿Dol、徐匯宗、飛龍 Arthur、Dave、康師傅

事緣有一日遇到心晴行動慈善基金會嘅朋友，講起佢地一直都想糾正社會對情緒病既偏見，令大眾明白到病患者唔係求其講一句「睇開啲啦」就會沒事，而《心晴跑‧跑傳情》慈善跑就係佢地其中一個搞左好多年既 project。我見今年跑大美督，條路幾順，忽發奇想喺跑團 HNR Running Team 組一隊落場。

喺一月組隊跑比賽一啲都唔易，始終大家都進入渣馬調整期，加上由賽季開始到宜家呢幾個月，好多人都出現大大小小嘅勞損，叫佢哋報比賽，絕不輕易！所以，我好感激有一班隊友肯挨義氣一路奉陪，尤其係長腿團長阿宗、男神阿Dol，佢哋膝頭一直未完全復原；另一位兄弟康師傅之前都大賽連連，老死 Dave 更加唔話得，本身已經公務繁忙無乜時間練習……

1月7日清晨，個天仲要好似倒水咁起勢落雨，當我哋一行5條佬準時係大埔墟集合，神到連蚊都唔放一隻，心裏面真係好感動，因為佢哋實在有太多理由唔去參賽了。

開跑之前煙霧瀰漫，鳴槍一刻突然撇雨，成條船灣主壩剩係睇到三分一條，阿宗負責做成績追單車一支箭就向前衝，阿Dol 同康師傅互相配速，好似康師傅咁講：「跑步也許孤單，但不孤獨」，一隊人跑有快有慢，未必有打波咁多語言交流，但係都講究團隊默契、互相扶持，跑到中段雨勢持續，但係越跑越勇，說好了5分披飆上4分半。

長腿團長阿宗 (圖: 跑步男朋友 running bfriend)

阿Dol  (圖: 跑步男朋友 running bfriend)

康師傅  (圖: 跑步男朋友 running bfriend)

由於能見度低既緣故，好多人誤判距離提早加速，到最後200米已經筋疲力竭，但係無咩比得上係終點線上見到完賽既隊友揮手，嗌你個名，甚至係側跟拍住一齊衝一段，值得大講特講既係康師傅最後同個對手鬥快，去到最後20米仲爭緊，當對手加速快咗半個身位嘅時候，康師傅突然再發力甩左佢衝過終點，呢種鬥心真係世界級。

本身開宗名義係開心Hea跑，點知比賽前幾日氣氛高漲一發不可收拾，儼然一副過終點就直接衝上頒獎台嘅氣勢，事情發展下去既結果，就係我地帶咗一支百佳$69.9特選香檳準備上台揈。如果唔係天氣實在太凍，不宜著住背心喺台上玩咁癲，相信我哋5個應該要留低抹地了。

今次 HNR 有幸包辦左幾個獎，獎杯大到煲湯都得，而且所有人總體都進步咗。同玩個人組追求PB既動力唔同，除左爭勝心之外，仲為每一個隊員跑，想再快小小縮短個平均速度，或者係唔想辜負已經衝左線既隊友，成件事真心好老土，但係好熱血。

男子青年個人組冠軍阿宗 (右) 及季軍飛龍 HNR Running Team 亦奪得公開組隊際亞軍

最後送上 有線《體育王》嘅訪問片段，HNR第一次上電視，係開心嘅：

HNR 跑步團隊 Facebook 專頁