Fitz > 運動 Sports > 跑步 Running > [找數真漢子] 馬拉松之旅 由街馬DQ開始

 

前言
2016年某月某日,麥徑3段上雞公山途中:

女:「你覺得行毅行難啲,定係跑全馬難啲?」
男(幾年前行過毅行,未跑過全馬): 「梗係跑全馬!」
女(跑過全馬,未行過毅行):「唔係吓話,毅行100K,全馬42.195公里咋喎!」
男:「吓,咁計嘅咩? 毅行行得慢都得,全馬要跑架喎!」
女:「毅行要4個人一條心,全馬自己搞掂就得,你話邊樣難啲喇!」
男(信口開河mode):「不如咁啦,你完成到毅行,我就去跑一次全馬。」
女:「嗱,你自己話架,唔好走數!」
男(心諗):「你抽到又搵到人仲要行到先算啦!」

就係咁,我喺2016年11月19日,正式踏上全馬找數之旅……

少少背景
如果你曾經投稿俾 Fitz,又或者參加過呢度嘅活動,我就係大家好可能接觸過嘅 Eric。身為編輯之一,喺 Fitz 成立近兩年入面,大大話話處理過四位數字嘅跑步文章,但說來慚愧,其實小弟唔單止無跑步,仲要係嚴重抗拒嗰隻,主要原因都係怕悶同腳痛……(所以Fitz嘅跑步文都係由其他跑步L編輯主理)。

無論行山定跑步,每次起步後無耐小腿都會好緊,係痛到要停低嗰隻,行山好啲有得唞,跑步要 keep 住衝所以好容易放棄。之前最長只試過比賽「跑」10K,仲要係半行半跑嗰隻,估計問題都係同磅數有關,仲要上年做 tabata 減嘅20磅已經還返一半,磅數重上2字頭。

街馬2016,右邊嗰個係blogger小昭



開始找數
既然要找數,一於就扮晒嘢學 Facebook 教主 Mark Zuckerberg 舊年咁宣布,2017係我跑步之年(Year of Running),經過12月暴飲暴食,終於都要開始。今次報名街馬半馬,其實係想認真知道自己同目標有幾遠,如果跑得掂,咁加下操就ok啦!結果未參加已經搵到答案……

首先嚴重感謝夏威醫生、Bonnie、Gamman同家聯,1月1日晚都陪我去夜跑青公,不過腳痛之外,都只係腳痛,跑9K行咗絕大部份,pacing每公里要10分鐘樓上(仲慢過行)。終於知死隔幾日自己再去跑5K,終於做到9分內,屈指一算,只要比賽跑得返呢個時間再快少少,咁3個鐘時限實返到去啦!(180分鐘 / 21.0975公里 = 8.53 min/km)數呢,就係咁計嘅,但學阿江主席話齋,自己真係 Too simple,sometimes naive….

街馬正日
唔知幾多人有興趣睇肥仔半馬DQ,不過即管寫返出嚟。過去幾年去街馬都係做嘢,今次落場心情當然會有唔同。天未光起身搭穿巴係折磨,去到會場又發現時間過得好快,起步前不停催眠自己:「跑到8分幾就返到終點,今日目標只係完成」,不過都有同自己講到明唔會勉強去chur,因為實在太多人驚我跑跑下暴斃。(網上怒插無準備就去跑嘅人,就係我呢啲哈哈)

起步後塞車塞人,小腿一如慣例痛到想死,死行到過橋先至好返少少,但已經俾掃尾大隊過頭,心諗今次大檸樂,使唔使咁快呀!? 同佢哋前後拉鋸咗好耐,終於上到觀塘繞道,跑咗11K用咗唔使個半鐘,又計數心諗 keep 到就掂(真係好錯),所以決定唔去盡留力最後 1/3路程(更錯),行吓又跑吓,最感動係對面線不斷有人同我打氣,每次都激勵我跑多幾步。



不停同掃尾大隊拉鋸

感謝跑得快我少少嘅Brandon幫我影相拍片,順手推下佢個Facebook page「眾裡尋貓」先,最後佢3小時內完成到

講到呢度,應該有師兄師姐提出疑問:「乜唔係有cut off time架咩?」呢個我都有留意,但諗住仲有時間應該OK,點知就嚟去到折返點12K折返點,聽到呢個噩耗……

N年前跑渣馬10K,都試過因為太慢去到水站無水,搞到喺東廊死住返維園,估唔到2017又嚟一次。老實講,大會義工已經好幫手,攞埋自己嗰支紅豆水出嚟斟俾大家,但始終份量有限幫唔到手(仲要我本來諗住食gel開始衝,無水唔掂),唯有攞兩條蕉就行人,不過掃尾大隊已經過返我頭……

其實到咗呢個時候,我都無乜特別感覺,一心諗住落到橋就得,8分幾一K我仲 keep 到吖!點知越跑越唔對路,點解追極都追唔到嘅?無水加天氣熱唔敢開盡 turbo,結果喺距離落橋位100米左右,親眼睇住佢哋拉閘……

好靜…….真係好靜。DQ上巴士,真係慢腳仔嘅另類體驗,一群剛被裁定失敗嘅跑手,中間真係無咩好講,唔通問隔離嗰個:「你點解跑得咁慢嘅?」唯一同我講嘢嘅義工叔叔,可能見我身型咁樣笑笑口問係咪練唔夠,我話呢個就梗係啦!除此之外,成程車都無人出過聲……



後記
搵藉口容易,認衰仔難。無水、天氣熱、條路斜,呢啲統統都係藉口,講到尾自己都係加利仔三大缺點:冇速度、唔夠快 、跑得慢,再講白啲就係唔夠 fit(驚覺肚腩真係好大,救命)。今次仲可以話自己小試牛刀,下次操 fit 咗再上巴士的話,真係會喊出嚟。運動呢樣嘢,你肯付出就會有回報,無得呃人更無得呃自己,今次連息都找唔到,真係時候認真開操,暫時計劃每月跑一個比賽,至於全馬條數呢,目標今年內找到啦…….

#找數系列第一回 #下回再見

更多:
Fitz.hk Facebook專頁
[日本馬] 頑強的那霸馬拉松
行住跑馬拉松 時間可能更快?
Fitz Running 跑步


文章為作者意見,不代表Fitz立場。