《鐵人父子 The Finishers》劇照
斷咗腳嘅人最想做咩？
第一係，想行。第二係，想死。
做人從來得不到的就是最想要，而最想運動就係唔郁得嗰陣，相信大家都試過。
----- 廣告 Ad -----
點解咁多人年紀咁上下就膝頭哥痛？因為過重。而膝頭哥痛又係史上業餘運動員最大專業藉口。
其實同信仰一樣，我地都無一條清晰嘅界線自己係幾時信，就好似我地唔知幾時已經無再去跑步，但我地最清楚自己幾時開始行唔到。
呢個就係心態中年同心態老年嘅分別，能力往往係不知不覺消失直到到左零嗰下，後悔莫及。到你唔可以再行，你就會想死。
心態老年其實同死咗無分別，做到你都當做唔到。幾年前有套法國電影叫《鐵人父子》，故事講一個前三鐵冠軍爸爸，有一個坐輪椅但要玩三項鐵人嘅仔，結果爸爸游水縛架橡皮艇，踩單車有個前座位，跑步加插推輪椅。一般人以為阿仔無付出，全程做包袱，但當你睇佢因為皮膚摩擦幾小時，皮開肉爛，苦不堪言，你先知道係邊個搵命搏，最後如果唔係佢做左d嘢，都唔可以限時內完成賽事。
佢個精神係無不可能，而佢點解要參加——係因為佢一次偶然發現佢爸爸係前三鐵冠軍。
點解人要病？好大程度因為病之前生活習慣唔多好，再咁落去唔死都殘。點解人要隻腳要傷，好可能再咁落去，佢會喺好似無咩事嘅時候，一鋪就清你袋。
所以，有舊患的人是有福的。因為你知道個能力減退緊，你無一番努力都去唔番八成。心態中年先係最幸福，得到、失去再想得到。望山見山，望山不見山，再到望山見山，山都已經不一樣。
----- 廣告 Ad -----
一個唔識游水嘅人，點解會定個三項鐵人嘅目標？因為佢瞓過ICU。
傳道書12:1-2
「1 你趁著年幼，衰敗的日子尚未來到，就是你所說「我毫無喜樂」的那些年日未曾臨近之先，當記念造你的主。 2 不要等到日頭、光明、月亮、星宿變為黑暗，雨後雲彩返回。 」
你被創造的身體，曾經擁有，又可曾被你記念？一個人唔可以去返青少年時期由頭開始訓練到100%，但宜家我想知得番80%嘅極限係咩。
咁你呢？你想行定想死
（下次會講：戰勝恐懼因為唔想死）
