16.01.2020-21.01.2020
42.195km 2’57’03
2020年開始不久，甚至目標都尚未訂立好，就已經膽操操孤身一人去左臺北跑比賽，人生第一場馬拉松，問心一句，賽前準備不足，一直都好擔心，直到比賽前一個月先開始長課，狀態又不在，絕對無諗過會 sub-3! 比賽前一晚仲瞓唔著，一直都碰上無數既問題!
賽前，慢跑到會場，寄存行李後便穿件便利雨衣作動態熱身，心入面都係淆哂底，起步前30分鐘早早上線，等到開賽一刻，頭5公里比其他人帶快了，大家一起步都十分興奮，我發覺唔對路，慢慢調整跑速，但肌肉已經有少少少少狀態，跟住一個集團去到10公里左右，望望錶，頭10公里先用左40分幾，心都亂埋，一度懷疑自己跑唔跑到番終點，然後再一次跟住集團再放慢少少跑速!
----- 廣告 Ad -----
之後半馬用左1‘26’00左右，個一刻已經出現左7成既疲態，但好彩肌肉仍然仲 support 到，然後見到有機會 sub-3，就係到諗橫掂點都係死，不如試下搏一搏頂埋佢，睇下可唔可以 sub-3，然後就離開左集團，自己追住 sub-3 黎跑! 沿途同左幾個人組了小團一齊跑上去，可惜佢地放慢左少少，個刻都好擔心自己仲可唔可以跑到上去，但既然決定左，死都要死上去!
直到28km，遇到了最深刻既戰友，兩個素未謀面既人，一齊望住3小時大關進發，沿途互有領先，互相鼓勵，我對腳已經出現好多多多既疲態，每一步都好辛苦，但佢都一直同我講: 意志! 堅持! 我地可以破3! 我個刻好想放棄對腳好攰好無力，但想減速個刻一諗到都挨左接近30km，其實都係差10km，其實都係一個鐘內既時候，我捉實左個一刻決心，真係無力都要頂硬上!
最後2km，我對腳已經抽抽地，望住手錶時間，其實減少少速都仲可以 sub-3，心灰到同戰友講: 我怕我因間同唔到你一齊衝線，好彩有你一直提醒我，如果唔係我都黎唔到40km呢個位置，講完之後有一句野閃過，PUSH YOUR LIMIT，呢句野真係好惡頂，由練習開始至今隊友一直都提醒我，既然開始左就要盡全力去對待呢一件事，咁既然都係兩公里，就膽操操加埋佢番去，最後就真係 sub-3 以2‘57’03衝線!
----- 廣告 Ad -----
跑步第四個年頭，跑過田徑賽，由中學800米跑到上年的半馬拉松，呢場初馬，我唔敢話自己係跑得最好既一場比賽，但係我心目中絕對係意志最堅定既一場比賽! 雖然跑馬拉松的確係無盡既痛苦，仲要有時付出心機同時間都未能如願達標，但過程中所鍛練既意志有時比實質既數字更難得!
2020其中一個目標完成! 但人望高處，如果我有能力，我都希望2020年可以將PB再一次推高!
廢話差唔多，大家都要 PUSH YOUR LIMIT，係無數次碰壁意志最消沉既時候，問自己當初點解會開始，捉實個一刻意志，如果唔係有D野想追都追唔番!
2020比賽大家都要加油啊! 除左保持良好心態之外，要有一個健康既身體!
