今年年初「渣打臺北公益馬拉松」,主辦大會喺賽前進行一項「全台首度跑者恐懼大調查」,向台灣參加者調查比賽前有咩最擔心。香港嘅跑友,喺渣馬起跑前夕,你哋所擔心嘅同台灣跑友會唔會相同呢?

全台首度跑者恐懼大調查

第一位: 賽前症候群 (約30%)

即係話無特定恐懼嘅事物,總之比賽前個心籮籮攣,乜都擔心。由身上裝備、身體狀況,以至當日交通、天氣等等,所有事情都患得患失。

解決方案: 一早執好行李搵齊裝備,唔好諗比賽唔好上網睇資訊。搵套戲睇下,搵本小說追下,都不失為好辦法。

第二位: 新手症候群 (27%)


對第一次參加嘅選手,會好擔心比賽前、中、後會出現狀況。例如驚唔識路放行李、驚miss咗水站,或者驚唔記得關閘時間……

解決方案: 照番你平時訓練咁樣跑就得。好多嘢都係船到橋頭自然直,邊驚得咁多。

賽前心情緊張,自然要成日去廁所

第三位: 天氣問題 (19%)

台北跑友擔心氣溫,係因為早兩年台北渣馬突然受到寒流侵襲。而佢哋好驚雨中作賽,驚會影響表現。

解決方案: 你要明白,「比賽日子一早定好,但天氣係會日日變。」所以,參加者要適應天氣,起步前做好準備其實無乜值得驚。2016年渣馬喺黃雨之下作賽,大家當日都跑得好辛苦,不過就成為大多數跑手最難忘嘅經驗。

第四位: 路面不平 (12%)

筆者唔知台北渣馬路面有幾差。不過香港渣馬,絕大多數路段都係高速公路,路面唔算差,但要注意行車線之間嘅貓眼石,一踏中就有拗柴嘅機會。

解決方案: 盡量跑在行車線中間,唔好踏上劃線嘅地方。跑嘅時候亦要留意路面有無凹凸不平嘅地方。

第五位: 跑得太快 (9%)

唔少台灣跑友驚起步初段太興奮,衝得太快,影響之後嘅表現。至於香港渣馬半馬同全馬,一起步嘅彌敦道,其實有少少落斜,好多跑友亦唔覺意跑快咗。

解決方案: 咁又唔需要keep住每公里望實隻錶,夾硬逼自己跑慢啲。總之放鬆嚟跑,真係覺得比預定步速太快嘅話,就嘗試慢慢收慢。記住,點樣去實行你嘅比賽計劃,亦都係作戰技巧一部份。

不過執筆之時,相信一眾跑友最擔心唔係上面呢五件事,而係排隊拎號碼布……

Fitz連結: https://fitz.hk/?p=113628


更多:
Fitz Facebook專頁
[渣馬備戰攻略] 寒冷天氣跑步大法 (日常練習與比賽須知)
[渣馬備戰攻略] 可以用跑步機練馬拉松嗎? (或其他長跑距離)
[渣馬備戰攻略] 科學支持 5種比賽前中後的飲食偏方
[渣馬備戰攻略] 4條經典長課路線
[渣馬備戰攻略] 如何進行長課練習?
Fitz Running 跑步

廣告
Fitz
我哋坐唔定、無時停,唔做運動唔舒服! 只要係有用知識、重要資訊,以至好玩話題,Fitz都會全力搜羅,同時鼓勵「郁民」齊齊參與,打造一個開放嘅運動生活資訊平台。