[渣馬備戰] 又濕又凍9個準備 (我的復仇大計)

中央氣象台嘅預測，1月17日，雨量有10-25毫米。唔算大雨，不過絕唔係毛毛雨。

報告天氣先：
多個天文組織（香港天文台、香港地下天文台、大陸氣象台、台灣氣象局……）均一致預測，星期日會有雨，仲要係大雨。而且，一度強烈嘅冷鋒將會喺星期日到達，到時氣溫會急降。喺呢一刻，諗到嘅景象會係：

1. 全身濕透（最慘一定係濕鞋濕襪）
2. 好凍，好凍，好凍。
3. 跑去到三條大橋，畀啲北風吹得更加凍（好彩仲算係初段，應該仲有力跑）
4. 條路好跣，想快都唔得。
5. 入到西隧雖然會暖啲，但個人濕晒，幾百幾千人焗喺入面，可能仲辛苦
6.  一個唔覺意抽筋腳痛，唔跑得要行，咁就變咗又痛又凍，雙重煎熬。
7. 就算完賽返到終點，如果唔可以第一時間換衫，隨時大病一場。

諗到呢到有啲驚。至於點應付水戰，就可以參考《[渣馬備戰] 6個打水戰的準備 》。（呢篇文集合各位bloggers嘅經驗寫成，單係山雞就有兩次毅行者遇著落大雨！）

波士頓馬拉松有專用雨褸派，渣馬都係金級賽事，點解我哋仲要去7仔買雨褸?

----- 廣告 Ad -----

對於落雨+寒冷嘅天氣，我會有9項準備：

1. 較好眼鏡：四眼佬好怕一路跑一路托眼鏡
2. 戴cap帽：防寒之外，最緊要係擋咗雨水整濕眼鏡（四眼佬係好麻煩）
3. 風褸：驚自己要行，要上巴士用嚟保暖
4. 紙巾：抹眼鏡
5. 全身重要地方搽晒花士令，腳板貼晒膠布。
6. 電話要用密實袋袋好
7. 帶現金帶八達通：若果又凍又濕又要上岸，唔通真係要企定定淋住雨等巴士？若果有路走，我會索性截的士、搭地鐵囉…… (根據大會規則，就算上岸都唔可以離開賽道㗎。)
8. 多帶朱古力（靠大會提供驚唔夠）
9. 寄存行李：衫褲鞋襪 + 羽絨 + 雨遮 (真係驚淋病)

跑完之後，會隨即去維園泳池沖熱水涼！（記得帶八達通及硬幣存物）

最壞打算：
渣馬大會喺星期四夜晚發出新聞稿，就叫大家留意比賽日凌晨三點有無公布(見上圖)。

不過，就算係落大雨，都應該唔會係紅雨啩。反而最擔心係因為雷暴而要中途腰斬。

講返自己復咩仇：
2015年嘅渣馬。當時我跑完42.195公里後，竟然發覺畀人DQ咗（取消資格），而大會嘅答覆，就係話我「上咗掃尾巴士」。(見舊文《[渣馬] 我無上巴士 你唔好屈我》)。

由於舊年嘅事，我入唔到官網嘅相簿，仲差啲連張初馬證書都無埋。所以希望，今年可以順順利利完成，堂堂正正咁返到終點，僅此而已。

最後，祝大家好運（希望天文台呢次估錯啦）

更多：
Fitz.hk Facebook專頁
[渣馬備戰] 6個打水戰的準備
[渣馬20周年感動呈獻] 救救小的的
[渣馬備戰] 2016渣打馬拉松路線探究(更新)
[渣馬備戰] 半馬全馬寄存行李安排 (2016年更新)
[渣馬備戰] 10K寄存行李多規距
渣馬專區@Fitz.hk