[渣馬備戰] 6個打水戰的準備

Sophia 2016-01-13

字 Decrease font size. 字 Reset font size. 字 Increase font size.

[渣馬備戰] 6個打水戰的準備f (星期四更新)：天文台喺星期四(1月14日) 罕有咁發出警告，話星期日天氣會「有雨，雨勢有時頗大」。至於氣溫嘅預測，維持喺14至18度，但天文台強調「一道冷鋒會橫過廣東沿岸」。即係話，呢次比賽好大機會落雨，仲有可能係大雨，伴隨住仲要面對氣溫急降！水戰3

淡定有錢剩，有人話「未經過水戰洗禮就唔算真正嘅跑手」，無錯，咩天氣我哋都要迎戰！不過，都要做好準備：

1. 越遲濕越著數
落雨一定會濕身，不過越遲濕越好。如果真係好大雨，可以喺最後一刻先換衫寄行李（注意人龍及起點線關門），令到戰衣喺起步前唔會太濕。亦可以去到比賽場地先換鞋換襪。總之，遲啲濕，就會比其他選手著數一啲。

不過，除非你著跑山鞋，否則一般跑鞋絕對唔會防水，所以好好貼晒膠布先上場比賽呀。而手機、耳機等，亦要做好防水措施，最簡單就係搵密實袋袋住。
（行李寄存時間：全馬及半馬，10公里）

----- 廣告 Ad -----

2. 防雨裝備
有跑友喺呢個星期一二已搜羅定便利雨衣（據講惠康買$8.5，7仔25蚊件呀！）。而便利雨衣可以喺起步前著住（選手大概要喺等候區等足15分鐘），擋雨兼保暖。而起,步之後，可以棄置，或隨便袋住，有需要拎出嚟著。其他裝備，就有防水風褸、帽，甚至手袖等。（補充：全身衣物要零棉質，棉質衣物濕水後會越嚟越重，最好揀快乾料呀。)

香港嘅渣馬呢幾年都無乜點落過雨。台北馬拉松就喺2013年大雨中作賽，大家睇下人哋有咩準備。

3. 皮膚護理
濕身更容易令皮膚磨擦受傷，記得喺重要部位（腳板、大肶內側，乳頭等）搽上凡士林等潤膚膏。甚至貼上透氣膠布。
而衣著方面，亦以貼身為宜，未有壓力衫褲可以考慮添置（又有藉口shopping嘞！）。
（見：《[渣馬20周年感動呈獻] 救救小的的》）

講皮膚護理，一諗就諗到沙灘哥。

4. 小心失溫
長期淋雨，容易令體溫過低，後果十分嚴重。特別對全馬或半馬選手來說，若比賽中途要慢行，又遇到高架橋嘅強風，真係好易冷親。
預防方法係以長袖衫褲作為戰衣，或穿著運動用手袖或腳套，加強衣服嘅保溫功能。
(補充：半馬或全馬選手，要長時間面對冷風冷雨，除了衣物保護，亦可自攜朱古力等高熱量食物維持身體熱量。)

5. 路濕地滑
渣馬賽道9成9都係馬路，同行人路唔同，馬路常有油跡。而油跡經雨水洗擦下會好滑。大家要高速發圍嘅話，過彎就要小心甩尾呀。

台北有長跑賽事，就係檢查站嘅地台搧到選手攤攤腰。

----- 廣告 Ad -----

6. 心理準備
「比賽先嚟落雨，唔通連個天都唔鍾意我……」中學生都知咁樣諗唔啱㗎啦，你仲咁諗？事實上，喺賽路上，每一個人都受天雨影響，如果你覺得自己辛苦咗，人哋一樣係咁啫。而落住雨跑無咁熱，可能你會鍾意㖭。呢個時候，不如搵個假想敵人跟住佢跑，反正落雨要PB都唔容易，放鬆啲跑，好好享受跑步樂趣啦！打水戰5大準備 7 最後要注意，就係記得帶定一套衫，跑完有得替換。因為運動完好易冷親，好易病㗎。

資料來源：Running Times、Huffpost

Sophia

平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」