[肥妹名古屋馬拉松追夢之旅] 夢想於漆黑裡仍然鏗鏘 (第1-2回)

第一回：夢想於漆黑裡仍然鏗鏘

當大家睇到呢篇文嘅時候，我已經抵達名古屋，準備兩日後參與名古屋女子馬拉松，嘗試挑戰人生第一場馬拉松。

今次呢一場，帶住誠惶誠恐嘅態度迎戰，因為絕對係一次越級挑戰。呢次挑戰，源自一次自己與自己嘅打賭。

去年經歷過一啲巨變，情緒直墮低谷。身處黑暗之中，幾乎有好幾晚都係瞓住喊醒。直至有一晚，突然諗起兩年前剛剛瘦身有成，參加人生第一場參加十公里賽嗰陣，跑到銅鑼灣避風塘聽到嘅《無盡》……

「夢想，於漆黑裡仍然鏗鏘。」呢一句好似突然敲醒咗我。

肥妹，你仍然記得你嘅夢想嗎？曾幾何時，你遙望香港東區走廊，矢志要鼓勵至少十個人同場參與人生第一場十公里，嗰團火去咗邊？

係喎，團火去咗邊？於是，呢點「無盡」星火燃亮咗肥妹呢幾個月嘅練跑之路。大概，四年前嘅200磅肥妹都無諗過四年後佢會走去抽馬拉松，仲要一抽就抽一個本地半馬、一個海外全馬，而結果竟然會係…

半馬落選，而海外全馬中了。

喺遞交申請之前，我只係參加過兩年十公里賽，呢兩年長跑對我嚟講，都不過係消脂同瘦身嘅工具。曾幾何時，我都FF過有一日會完成十年十公里，希望借助長跑嘅力量維持體重（唔係你以為減咗七十幾磅唔_駛Keep呀）。直到決定跑更遠，我先發現原來長跑係天使帶俾我嘅一份禮物。

呢份禮物，係用汗水、時間換返嚟，而最佳回禮，永遠都係感恩。

無論走上邊一段路，無論走上香港、台北、定係名古屋，每踏出嘅一步都係值得我哋向上天、向身邊嘅所有報以微笑。

感謝你，馬拉松。我一直以為你就如電視機上嘅馬德鐘，遙不可及。直到遇上你，我先發現每一段走過嘅路都係為咗今日。由不良於行、到行得返、跑得郁，今日竟然踏上初馬追夢之旅。儘管訓練不足，訓練初期曾經受傷、甚至自我懷疑，不過呢一刻嘅我，已經無悔了。I AM READY TO RUN！
肥妹深信，初馬只係人生馬拉松嘅起點，無論今次結果如何，成功或DQ，呢一段路都無悔走過。成功了，日後尚有多少場大賽等待緊你。若然DQ了，再好好養戰，路一直都在。

只要相信夢定能飛。

第二回：只要相信夢定能飛

從前搭飛機，諗起嘅第一首歌總係陳奕迅嘅《歲月如歌》。今日，當香港快運 UO656 航班起飛嗰下，諗起嘅係方皓玟嘅《你是你本身的傳奇》。

「你是你本身的傳奇，前路裡振翅再高飛。」

https://youtu.be/tmmliJjsizc

振翅之後，身處九霄雲外，呢三小時航班，係一個好好嘅靜思時刻。就算係廉航嘅經濟客位，無機艙娛樂，只有眼前嘅電話，仲有周圍走嚟走去嘅機艙服務員，旅客一樣可以自得其樂。別人嘅樂可能係電子遊戲機，我嘅樂就係文字分享，喺手機應用上一個字一個字咁打。直到班機抵達名古屋中部國際機場，網絡重新連接一刻，呢三個鐘嘅小確幸就會出現喺大家眼前。

係嘅，喺機上做乜諗嘢呢？思考嘅過程助你淨空心靈，放低平日嘅工作，專心迎接班機降落，旅程開展嘅一刻。

呢個動作看似平凡，但同時係難得嘅一件事。乘搭飛機嘅時候，若然身體有任何不適，總係會超音速地反映喺你身體不同部位上。數年前獨遊高雄嘅時候，試過一次耳膜痛到要搵機艙服務員求救，嗰種痛再配上本身嘅情緒問題，負能量就喺一程機內加倍。因此，就算今日就算上機後開始作經痛，只要仍能寫，一樣係一班舒適嘅航機。

嗱，明知接近生理期，網上預訂仲要叫蕎麥冷面呢啲傻事絕對係自己攞嚟。最後點算？將冷麵放入熱湯，扮湯麵，頂住檔先。

從前未體驗過服務，對廉價航空公司嘅印象總係傾向負面。今早體驗，又覺得其實都好唔錯。飛機餐係事前預訂嘅，加多$65就可以享用。可能係成日聽到太多人講飛機餐好難食，一遇上正常食物先好似人間極品咁。（如果連冷麵都可以整得難食，間公司就真係極品喇。）

整體嚟講，首次廉航體驗改變咗我一啲對固有廉價航空公司嘅睇法。佢哋嘅冒起，實在係一眾窮L嘅福音。若然預算係窒礙年青人向前嘅理由，換一個較簡約嘅模式，將本來歸於「想要」嘅服務，換來一張較便宜嘅機票。昨日本來無法飛嘅人，今日可以飛，又有何不可？

只要相信夢，定能飛。我嘅夢係有一日更多人睇到自己嘅文字、分享之後，會由零運動開始運動、甚至係參與長跑賽事。若然你心中都有一個夢，那就去追吧。即使你可能會遇到各樣困難，但至少你會為呢個目標去追，去克服各種困難。你自己都唔信自己會飛，又何以教別人相信你飛到？

班機降落名古屋中部國際機場，我步出入境大堂，頭頂出現名古屋女子馬拉松2017嘅大型宣傳品。我仰望住呢幾個女生，開始感受到呢一步一步帶俾我嘅力量。

嗰一刻，我誠心祈願，願那一天我們都會飛。

Katrinauntie Facebook 專頁