Fitz > 運動 Sports > 跑步 Running > 賓叔叔唔跑得齋講跑系列 (二) | 只要 Keep 得好,跑到衰老變衰佬!

續上篇: 做乜跑步? 運動癖!

點解要跑步已經難答,仲想跑幾耐更加難上加難!

正所謂 : 為甚麼跑步,不足為外人道 。

香港人功利至上時間寶貴,錙銖必較乜都要 Jet 素。日日跑月月跑年年跑,烈日當空又跑,寒風凜冽又跑,跑完渣馬跑東馬,跑完倫馬跑波馬,咁到底要跑到幾時?

黃師傅話 (佛山嗰個):「做人,做事 ,要有目標。無目標,就好似盲頭烏蠅咁,亂飛,浪費精力白廢人生,知道,無呀? 寛!」(必須注重黃師傅嘅停頓位!)

大部分頂級運動選手,狀態都係廿幾三十歲係高峰,消耗特大量體力嘅運動,例如游泳同網球,高峰嚟得更早。但長跑偏偏例外,年紀因素嘅影響相對上無咁大。

好多人嘅直覺或者認知係,年紀大咗,肌肉、骨骼、體力冚嘭唥走下坡,運動員容易受傷,而長期受傷係退出運動嘅常見主要原因。幾年前睇過 Runners 雜誌講過,馬拉松跑手受傷比率並不比其他相對短路程賽事為高。更有趣發現係,最常受傷嘅反而係參加馬拉松或者長跑嘅較年輕跑手。似乎受傷與否,準備是否充足比年紀好似更有關係。

長跑,馬拉松,100K 等運動需要計算同策略,唔太可以單靠拼勁。長跑係關於耐性、謹慎、重視養成習慣,呢啲都係叔叔姐姐等「成熟」跑手嘅強項。「成熟」跑手未必跑得好快,但反而可以跑得遠,因為叔叔們懂得點樣pace自己,幾時快幾時慢,分寸感掌握自如。只要努力避免受傷,分分鐘長跑長有。

Nike Co-Founder Bill Bowerman 曾經講過一句名句: “If you have a body, you are an athlete.”

賓叔叔話 : 「只要 Keep 得好,跑到衰老變衰佬!」

Let’s Enjoy Running!
完。
おわり

(待續)

「賓叔叔」雷彬冶文其他文章


文章為作者意見,不代表Fitz立場。
歡迎投稿: https://fitz.hk/contribute/