----- 廣告 Ad -----
![](https://i0.wp.com/fitz.hk/wp-content/uploads/2019/03/跑左三年,究竟有咩得著-4.jpg?resize=960%2C640&ssl=1)
圖: William Leung@Photosbyme Photography 遊。我攝
前言: 跑咗三年多少少,剛剛於香港渣打馬拉松完成初馬。一直有好多野想多享,係陳伯鼓勵下第一次投稿。
初心者的高牆
由細到大都冇運動細胞,只係叫做鍾意踢波。早幾年因為工作忙碌同女兒出世,連足球都放棄埋。體重去到最高峰嘅220磅; 之後因緣際會底下參加咗新嘅球隊,點知一落場10分鐘就冇氣。
就係因為咁,我去咗跑步。
----- 廣告 Ad -----
2015年10月11日,我第一次落街跑步。家住鰂魚涌,老婆話: 你想練氣不如跑柏架山道啦。柏架山行過幾次,跑係未試過嘅……最後我應該用慢過行嘅速度完成人生第一個5公里。
但係我好滿足。唔知係因為安多芬定係憧憬下場波可以打足90分鐘,明明好攰我過咗兩日又跑過。當時係以真·八分坡完成另一個5公里。
果時未養成跑步嘅習慣,跑步最吊詭嘅係冇得跑時就成日話想去跑,但係到你出門口時又有千千萬萬個藉口:
- 今日OT不如休息一下
- 有新Game不如打埋先啦
- 食得太飽不如休息多一日
- Weekends不如訓多陣
- 太熱太凍太濕太乾……
就算出咗發又真係即刻跑咩:
- 不如拉多陣筋先開始
- 跑得咁慢跑黎做乜
- 小腿痛,橫膈膜又痛唔好跑咁快喇
- 好攰不如行一陣再跑
- 實在太多太多原因可能揸流攤….究竟點先可以穿越高牆?
見自己
我,需要一個目標。
為咗可以更加有恆心,我決定要定個目標,就係最基本嘅60分鐘内跑完一個10公里比賽。有明確目標,就開始上網搵資料搵訓練計劃。屎波架生多緊係即刻買埋新跑鞋同跑錶定時練習。
開始掌握基本功,明白點睇同用心率幫助訓練,咩係 tempo 咩係 interval; 跑得容易咗舒服咗,腳又冇痛,滿足感又返來。Facebook不上載,記錄不存在; 我越來越多跑步嘅posts,跑完仲要6:30披咁快唔刷存在感跑黎做咩?
還記得第一次10公里比賽係2016年天水圍10公里,跑完第二日即刻搵相,果日我即刻去買咗副黑超。
香港人你有壓力我有壓力,不過跑多咗,壓力又真係好似少咗,輕磅咗人又好似健康咗。每次跑步都可以清空自己嘅思緒,有時跑跑下仲會諗到新ideas;而且因為要去練習,每日有規律咗積極咗; 快啲做曬家務,處理生活瑣事、同阿囡玩讀故事之後跟足訓練計劃準時換衫出發。
I think I see a better self,我唔再係果個淨係坐喺度唔郁嘅肥仔。
![](https://i0.wp.com/fitz.hk/wp-content/uploads/2019/03/跑左三年,究竟有咩得著-1.jpg?resize=960%2C640&ssl=1)
圖: William Leung@Photosbyme Photography 遊。我攝
跑步的成就感
人每完成一件工作/一件事情都會增加成就感滿足感。例如返工清曬啲email,食完飯洗曬屋企啲碗,或者打機過關打贏終極boss。而跑多咗自自然然就多咗目標。完成半馬,之後要sub-2完成另一個半馬,又要挑戰50分鐘內跑個10公里; 挑戰全馬。每完成一個距離做到一個時間都係一個成就解鎖……
所以其實跑步係用嚟刷成就感的。
正所謂沒有奇蹟只有累積,大家都要月結睇下邊個跑得多; 只要跑就可以累積里數可以得到大家嘅認同加祝福,跑到成績當然可以贏得大家更多嘅掌聲。
----- 廣告 Ad -----
咁究竟跑隻全馬我係想挑戰自己,刷成就感定係成為一個跑步機器呢?
退一步睇,開始時點解去跑呢? 跑步想健康但係點解成日痛成日受傷? 咁辛苦為乜? 我冇答案,不過仲跑得我想再跑多啲睇下。
![](https://i0.wp.com/fitz.hk/wp-content/uploads/2019/03/跑左三年,究竟有咩得著-3.jpg?resize=960%2C640&ssl=1)
圖: William Leung@Photosbyme Photography 遊。我攝
初馬的喜悅
我冇諗過跑完全馬我會有答案。凖備初馬,就只係練習練習再練習,長課長課又長課; 得閒就研究配速策略呀,水站同路線。我只係想強啲同快啲。我只係一心想完成同做到心目中嘅成績……
當日依足劇本,直到出西隧果時都冇事,但係去到干諾道西天橋開始冇乜力。果一刻又再諗咁辛苦為乜? 有人話過跑步鍛煉嘅係意志,跑步真係成日都攞苦嚟辛; 不過到果一刻點辛苦都要捱埋佢。因為一心做成績跑埋佢,雖然話靚相係一世,不過我揀咗成績; 就算見相機都冇cut線。(依家好後悔因為真係冇相)
最後跑完成績比預期好,我就已經諗緊出年嘅目標。作為一個跑步機器我想知我自己嘅limit係邊。挑戰自己亦都可能係認識自己嘅開始。
成功跑完初馬話唔開心就呃你嘅。不過我又唔覺得特別開心,係未就係 Runner’s blue 呢?
![](https://i0.wp.com/fitz.hk/wp-content/uploads/2019/03/跑左三年,究竟有咩得著-2.jpg?resize=960%2C640&ssl=1)
資料圖片 攝: William Leung@Photosbyme Photography 遊。我攝
見天地見眾生?
我一開始跑步只係想減肥同練氣,依家因為跑步優先又再一次放棄踢足球了。跑步之後身型又真係好咗啲啲噤多,但係長跑帶來嘅喜悅又係未只係咁表面?
其實我鐘意睇人物傳記,亦到鍾意聆聽別人嘅故事 (簡單啲講就係八卦)。每個人都有佢自己嘅故事,每個人都有可以學習嘅地方; 每個人都有唔同嘅原因開始跑步,我覺得我認識自己多咗,不過我仲繼續搵緊最後答案。作為長期新手,更快更強只係過程,或者答案可能係下個終點等緊我。
你,又搵到你嘅答案未呢?
----- 廣告 Ad -----
Fitz連結: https://fitz.hk/?p=114963
Fitz Facebook專頁
[Jay的跑步筆記] 跑東京馬的裝備
兩年,由3km走到sub-3
跑得最慢的選手唔係臘鴨
Fitz Running 跑步