[京都馬拉松2018] 全民為你打氣的日本馬

由

2018-02-19

Fitz > 運動 Sports > 跑步 Running > [京都馬拉松2018] 全民為你打氣的日本馬

徐匯宗 (左) 李盛 (右)京都馬拉松係聞名已久既日本馬😍 唔知國際田聯係點樣評啲馬拉松係咩級，京馬竟然係銅級而港馬係金級咩玩法…

不過日本人做野就係，理得你咩級，就算細微到冇人睇既野都會做到最好，呢個亦係日本最吸引我嘅原因之一。京馬自然亦都一樣，同港馬冇得比。☺

拎選手包時首先送你一件即棄雨衣，少跑比賽既可能唔覺得係一回事，平時我都冇著黎比賽，但喺1度嘅溫度起跑就差好遠。

起點設喺運動場入面，分S，A至J區，男士大小便會分唔同廁所，就算臨起跑前半粒鐘，小個便都係等唔洗一分鐘就ok😧而且可以輕鬆入番自己個區。

我被分到A組起步，大家都好快，我理所當然地被帶快😑。本黎諗住330，keep住5分就算，但我冇諗住一開就5分，跑多兩跑2，3k開始全世界變左445-450，15k開始隻腳緊緊地，心知不妙，20k右腳四頭抽左一野，突然好驚，😨因為其實係我第一次比賽抽筋，而之前都未試過抽四頭😐唯有放慢啲繼續努力死頂，但心諗仲有成一半，後半實好難捱😢

捱到30k被 330pacer 過左 (目測好似得330有pacer)，30k後簡直惡夢，一路作抽，右腳仲要四頭 hamstring 都想抽，焗住收到個動作勁細，變左慢 jog…腳板又痛，膝頭又痛，就係咁 jog 到番終點😑

今次可以話係除左初馬，跑得最差既一次! 差在又做唔到成績，又跑得勁辛苦，享受唔到後半程。🤢

講番個比賽，前半段既打氣團賽真係好抵讚! 打太鼓真係冇得輸! 成個人即刻上晒力，勁有火；仲有啲跳舞表演都好令人熱血沸騰，聽到佢地嗌破喉嚨喺咁低溫咁早出黎幫自己打氣果下真係感動到差啲喊！但後半段就好似唔見晒呢啲表演😢不過全程都有一堆好熱情既市民不斷嗌奸爸爹同 Fight~😘 仲有啲日本跑手會逐個ありがとう，痴線架!

另外唔少得係個景真係好靚! 好在比賽日好天，又夠凍，藍天加上遠處仲落住雪既山，成個feel真係好正! 再講 cp 水站，一開始都係水同運動飲料，去到半程打後先有野食，有鹽丸，麵包，綠茶紅豆麻糬😍，車厘茄，士多啤梨，香蕉，仲有好多市民請嘅糖😋

完賽後義工門不斷拍手迎接，由衝線去到拎行李😧真係覺得自己好似奧運選手咁…衝線後會有工作人員幫你戴牌同毛巾，再即時拎埋張完賽證書，成個過程好順暢。之後拎完行李入番展覽館會場，開住暖氣比跑手休息，樓上就有免費嘅麵豉湯，按摩同浸腳，仲有唔同美食攤檔作即時補給。