係咪天寒地凍，你同我都有千百個理由唔做運動，之後又會好內疚。本身有跑步習慣哈佛大學演化生物學家 Daniel E. Lieberman，就以人類學研究解釋大家懶做運動嘅原因，希望可以為各位解脫。
原始人每日80%時間休息
有人認為人類發展初期，以狩獵及採集為生，呢兩方面令人體結構適合於跑步及站立，所以長時期坐低係違反人體結構，影響健康。
不過，Daniel 從另一角度解釋人類同做運動嘅關係。Daniel 話，從人類學研究得知，原始人類雖然要打獵先可以搵到食物，不過其實佢哋跑動時間並唔長。以日頭12小時計，人類只係用2.5小時左右去打獵或採集，其餘大約10個鐘都係休息同進行社交活動。因為，每一次追野獸打獵，或每一次爬樹採摘生果，身體都要消耗大量能量，而喺強敵林立嘅原始時代，「能量」絕對係保命嘅重要資源。呢個現象，亦見於當今獅子、獵豹等草原肉食獸類嘅生活習慣，佢哋喺非必要之下，都唔會做大幅度嘅肢體運動，而每日絕大部份時間都係休息，以保留體力。
所以，Daniel 告戒大家，懶做運動絕對唔使內疚，呢個想法其實源自我哋祖先嘅習慣，唔需要感到羞恥。
哈佛大學演化生物學家 Daniel E. Lieberman
----- 廣告 Ad -----
每周做150分鐘運動
Daniel補充，現代人類雖然唔使打獵先搵到食，但唔好忘記，做運動可以維持身體健康。Daniel 話，佢同哈佛大學嘅校友做過統計，發現每個星期至少做150分鐘 (每日做21分鐘)，比起無做運動嘅校友，死亡率低約50%。所以，身體健康呢個益處，應該係大家做運動嘅推動力。
資料: Harvard Gazatte
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。